Җәнубий вә шималий корейә рәһбәрлири панмунҗумда учришип, уруш һалитигә хатимә беридиғанлиқини җакарлиди

Мухбиримиз әркин
2018-04-27
Share

27‏-Апрел җәнубий корейә президенти мун җеин билән шимали корейә рәһбири ким җуңун панмунҗумдики тинчлиқ сарийида учришип, икки тәрәпниң бу йил ичидә уруш һалитигә хатимә беридиғанлиқини җакарлиди.

Бу бир шималий корейә рәһбириниң тунҗи қетим уруш тохтитиш сизиқидин өтүп, җәнубий корейә земиниға кириши вә җәнубий корейә президенти билән тарихий сөһбәт өткүзүшидур.

Ким җуңун җүмә күни әтигән дәл саәт 9:30 да панмунҗум уруш тохтитиш сизиқи-38‏-параллилға йетип келип, чегра сизиқиниң у тәрипидики җәнубий корейә президенти мун җеин билән қол елишип көрүшти вә униң һәмраһлиқида чегра сизиқидин өтүп җәнубий корейәгә кирди. Мун җеин панмунҗумда мурасим өткүзүп, ким җуңунни күтүвалди.

Икки тәрәп сөһбәттин кейин “панмунҗум хитабнамиси” ға имза қоюп, бу йил ичидә уруш һалитигә хатимә беридиғанлиқи, тинчлиқ келишими имзалап, америка вә хитайни өз ичигә алған көп тәрәп сөһбитини алға сүридиғанлиқи, һәр икки тәрәп дүшмәнлишишкә хатимә беридиғанлиқи, ахирқи нишаниниң корейә йерим арилини пүтүнләй ядросизлаштуруш икәнликини билдүргән.

Лекин, һәр икки тәрәп ядросизлаштуруш нишанини конкрет қандақ әмәлгә ашуридиғанлиқи һәққидә һечқандақ учур бәрмиди, әмма сөһбәтниң наһайити утуқлуқ өткәнликини билдүрди.

1953‏-Йили корейә уруш тохтитиш келишими имзаланғандин бери сеол билән пийоңяң изчил уруш һалитидә туруп кәлгән. Бу һаләт йеқинқи айларда шималий корейәниң ядро вә башқурулидиған бомба синақлирини елип бериши нәтиҗисидә техиму җиддийлишип, уруш партлаш гирдабиға берип қалған иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт