Корла-голмут төмүр йолиниң релисини ятқузуш қурулуши тамамланған

Мухбиримиз әркин
2019-06-17
Елхәт
Пикир
Share
Принт

Хитай, муһим истратегийилик қурулуш түрлириниң бири болған уйғур райониниң корла вә хотән районлирини төмүрйол арқилиқ биваситә хитайниң чоңчиң шәһиригә бағлаш қурулушиниң корла-голмут төмүр йол релиси ятқузулуп болған. Көзәткүчиләрниң илгири сүрүшичә, әгәр бу төмүр йол линийәсидә қатнаш башланса, байинғолин области вә хотән вилайити хитайниң ичкири өлкилиригә биваситә ечиветилип, хитайларниң бу җайларға, болупму хотән вилайити тәвәсигә келиши үчүн қумул, үрүмчи, ақсу, қәшқәрләрни айлинип өтүшигә һечқандақ һаҗәт қалмайдикән. Көзәткүчиләр, буниң техиму көп хитай көчмәнлириниң тәклимаканниң җәнубидики районларға еқип киришини кәлтүрүп чиқиридиғанлиқи вә уйғурларниң турмуш усулиға техиму еғир бесим елип келидиғанлиқини илгири сүрмәктә.

Хитай таратқулириниң хәвәр қилишичә, 1213‏ километирлиқ корла-голмут төмүр йолиниң релисини ятқузуш қурулуши 16‏-июн күни тамамланған болуп, униңда бу йилниң ахирлири рәсмий қатнаш башлиниши пиланланмақтикән. Голмут-корла төмүрйол қурулуши 2017‏-йили 5‏-айда башланған. Бу қурулуш дәл хитай һөкүмити уйғур, қазақ вә башқа мусулман хәлқләрни кәң көләмлик тутқун қилип, йиғивелиш лагерлириға қамиған бир мәзгилгә тоғра кәлгәниди.

Голмут-корла төмүр йоли чиңхәйдики голмуттин башлинип, миран, чарқилиқ, лопнур қатарлиқ наһийәләрдин өтүп, корла шәһиригә тутишиду. Бу төмүр йол чақилиқ наһийисигә кәлгәндә 2 линийәгә айрилиду. Бир линийә корлиға, йәнә бир линийә хотәнгә қарап маңиду. Хитай таратқулириниң илгири сүрүшичә, хитай һөкүмити хотән-чақилиқ төмүр йол қурулушини 2018‏-йили 5‏-айда тәстиқлиған. Әсли пиланда хотән-чақилиқ төмүр йолини голмут-корла төмүр йоли билән охшаш бир вақитта пүттүрүш пиланланған болсиму, лекин хитай таратқулирида хотән-чақилиқ төмүр йолиниң әһвали һәққидә һечқандақ учур берилмигән. 

Хотән-чақилиқ төмүр йолиниң омуми узунлуқи 825 километир болуп, бу линийә лоп, чирийә, керийә, нийә, чәрчән наһийәлирини бесип өтиду. Хитай таратқулириниң ашкарилишичә, мәзкур төмүрйол линийисиниң қурулушиға 22 милярд 100 милйон йүән мәбләғ аҗритилған икән.

Толуқ бәт