Korla-golmut tömür yolining rélisini yatquzush qurulushi tamamlan'ghan

Muxbirimiz erkin
2019-06-17
Élxet
Pikir
Share
Print

Xitay, muhim istratégiyilik qurulush türlirining biri bolghan Uyghur rayonining korla we xoten rayonlirini tömüryol arqiliq biwasite xitayning chongching shehirige baghlash qurulushining korla-golmut tömür yol rélisi yatquzulup bolghan. Közetküchilerning ilgiri sürüshiche, eger bu tömür yol liniyeside qatnash bashlansa, bayin'gholin oblasti we xoten wilayiti xitayning ichkiri ölkilirige biwasite échiwétilip, xitaylarning bu jaylargha, bolupmu xoten wilayiti tewesige kélishi üchün qumul, ürümchi, aqsu, qeshqerlerni aylinip ötüshige héchqandaq hajet qalmaydiken. Közetküchiler, buning téximu köp xitay köchmenlirining teklimakanning jenubidiki rayonlargha éqip kirishini keltürüp chiqiridighanliqi we Uyghurlarning turmush usuligha téximu éghir bésim élip kélidighanliqini ilgiri sürmekte.

Xitay taratqulirining xewer qilishiche, 1213‏ kilométirliq korla-golmut tömür yolining rélisini yatquzush qurulushi 16‏-iyun küni tamamlan'ghan bolup, uningda bu yilning axirliri resmiy qatnash bashlinishi pilanlanmaqtiken. Golmut-korla tömüryol qurulushi 2017‏-yili 5‏-ayda bashlan'ghan. Bu qurulush del xitay hökümiti Uyghur, qazaq we bashqa musulman xelqlerni keng kölemlik tutqun qilip, yighiwélish lagérlirigha qamighan bir mezgilge toghra kelgenidi.

Golmut-korla tömür yoli chingxeydiki golmuttin bashlinip, miran, charqiliq, lopnur qatarliq nahiyelerdin ötüp, korla shehirige tutishidu. Bu tömür yol chaqiliq nahiyisige kelgende 2 liniyege ayrilidu. Bir liniye korligha, yene bir liniye xoten'ge qarap mangidu. Xitay taratqulirining ilgiri sürüshiche, xitay hökümiti xoten-chaqiliq tömür yol qurulushini 2018‏-yili 5‏-ayda testiqlighan. Esli pilanda xoten-chaqiliq tömür yolini golmut-korla tömür yoli bilen oxshash bir waqitta püttürüsh pilanlan'ghan bolsimu, lékin xitay taratqulirida xoten-chaqiliq tömür yolining ehwali heqqide héchqandaq uchur bérilmigen. 

Xoten-chaqiliq tömür yolining omumi uzunluqi 825 kilométir bolup, bu liniye lop, chiriye, kériye, niye, cherchen nahiyelirini bésip ötidu. Xitay taratqulirining ashkarilishiche, mezkur tömüryol liniyisining qurulushigha 22 milyard 100 milyon yüen meblegh ajritilghan iken.

Pikirler (0)
Share
Toluq bet