Хитайниң қаттиқ бастурушидики уйғур районида корла шәһириниң нопуси зор дәриҗидә азийип кәткән

Мухбиримиз әркин
2019.12.25

Хитай һөкүмитиниң уйғур районидики кәң көләмлик тутқуни башланған йеқинқи 3 йил мабәйнидә корла шәһириниң нопуси зор дәриҗидә азийип кәткән.

Әнглийә “малийә вақти гезити” ниң хәвәр қилишичә, райондики қаттиқ бастуруш нурғун хитай пуқралириниң ичкири өлкиләргә қайтип кетиши шундақла йәрлик иқтисадниң қаттиқ бузғунчилиққа учришини кәлтүрүп чиқарған.

Корла шәһири уйғур аптоном районидики 2 чоң шәһәр болуп, йеқинқи йилларда бу җай хитайдики нефит, тәбиий газ ширкәтлириниң асаслиқ базисиға айланған иди.

“малийә вақти гезити” ниң хәвиридә илгири сүрүлүшичә, хитай һөкүмитиниң йеқинқи 3 йил ичидики бастурушида корла шәһириниң нопусиниң йерими азийип, бурунқи500-600миңғичә болған шәһәр нопуси һазирқи200-300 миңғичә болған санға чүшүп қалған. Хәвәрдә корла шәһиридин айрилған бу нопусниң көп қисми хитай нефит ширкити тәрипидин бәрпа қилинған хитайдики әң чоң нефит базисиниң җәлп қилиши билән бу районға кәлгән хитай көчмән пуқралири икән. Лекин хәвәрдә шәһәр нопусиниң йериминиң азийип кетишидә лагерларға елип кетилгән йәрлик уйғур нопусиниң қанчә пирсәнтни тәшкил қилидиғанлиқи шундақла буниңда даимлиқ яки ақма нопусниң көздә тутулғанлиқи ениқ тәкитләнмигән.

Хитай таратқулириниң илгири сүрүшичә, корла шәһиридә 400 миң ақма нопус яшайдикән. “малийә вақти гезити” ниң хәвиридә хитай даирилириниң аз дегәндә бир милйон уйғурни тутқун қилиши, райондики нурғун җайларни адәмсиз “езитқу шәһәрләр” гә айландуруп қойғанлиқи, буниң йәрлик иқтисадқа қаттиқ бузғунчилиқ қилғанлиқи тәкитләнгән. Хәвәрдә нәқил кәлтүрүшичә, 2016‏-йилдин бери корла шәһири җайлашқан байинғолин областида муқим мүлүккә селинған мәбләғ 78. 4 Милярд доллар, өй-мүлүк тәрәққияти 734 милйон доллар азайған.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.