Xitayning qattiq basturushidiki Uyghur rayonida korla shehirining nopusi zor derijide aziyip ketken

Muxbirimiz erkin
2019-12-25
Élxet
Pikir
Share
Print

Xitay hökümitining Uyghur rayonidiki keng kölemlik tutquni bashlan'ghan yéqinqi 3 yil mabeynide korla shehirining nopusi zor derijide aziyip ketken.

En'gliye "Maliye waqti géziti" ning xewer qilishiche, rayondiki qattiq basturush nurghun xitay puqralirining ichkiri ölkilerge qaytip kétishi shundaqla yerlik iqtisadning qattiq buzghunchiliqqa uchrishini keltürüp chiqarghan.

Korla shehiri Uyghur aptonom rayonidiki 2 chong sheher bolup, yéqinqi yillarda bu jay xitaydiki néfit, tebi'iy gaz shirketlirining asasliq bazisigha aylan'ghan idi.

"Maliye waqti géziti" ning xewiride ilgiri sürülüshiche, xitay hökümitining yéqinqi 3 yil ichidiki basturushida korla shehirining nopusining yérimi aziyip, burunqi500-600mingghiche bolghan sheher nopusi hazirqi200-300 mingghiche bolghan san'gha chüshüp qalghan. Xewerde korla shehiridin ayrilghan bu nopusning köp qismi xitay néfit shirkiti teripidin berpa qilin'ghan xitaydiki eng chong néfit bazisining jelp qilishi bilen bu rayon'gha kelgen xitay köchmen puqraliri iken. Lékin xewerde sheher nopusining yérimining aziyip kétishide lagérlargha élip kétilgen yerlik Uyghur nopusining qanche pirsentni teshkil qilidighanliqi shundaqla buningda da'imliq yaki aqma nopusning közde tutulghanliqi éniq tekitlenmigen.

Xitay taratqulirining ilgiri sürüshiche, korla shehiride 400 ming aqma nopus yashaydiken. "Maliye waqti géziti" ning xewiride xitay da'irilirining az dégende bir milyon Uyghurni tutqun qilishi, rayondiki nurghun jaylarni ademsiz "Ézitqu sheherler" ge aylandurup qoyghanliqi, buning yerlik iqtisadqa qattiq buzghunchiliq qilghanliqi tekitlen'gen. Xewerde neqil keltürüshiche, 2016‏-yildin béri korla shehiri jaylashqan bayin'gholin oblastida muqim mülükke sélin'ghan meblegh 78. 4 Milyard dollar, öy-mülük tereqqiyati 734 milyon dollar azayghan.

Toluq bet