Korlidiki Uyghur - xitay toqunushi xitay ahalisini sarasimige salghan

Muxbirimiz jüme
2013-03-09
Share

Korlida Uyghur - xitay toqunushi yüz bérip 4 adem ölgenliki xewer qilin'ghandin kéyin, bu korlida turushluq xitay ahalisini sarasimige salghan, hökümet uqturush chiqirip xitay puqralirini kochigha chiqmasliqqa buyrughan.

"Nyu - york waqit géziti" ning xewer qilishiche, kochigha chiqmasliq buyruqi jüme küni emeldin qaldurulghan.

Emma, da'irilerning korlidiki bu toqunush we toqunushtin kélip chiqqan aqiwettin jiddiy ensirigenliki perez qilinmaqta.

"Nyu - york waqit géziti" ning neqil qilishiche, korlidiki bir méhmanxana xojayini li tawjyé weqening kélip chiqish sewebi heqqide oxshimighan ikki xil hékaye anglighanliqini bildürgen.

Buning biride bir Uyghur yash xitay achqan qimarxanida hemme pulini utturuwetkechke xitay xojayindin utturuwetken pulining bir qisini qayturup bérishni telep qilghanliqi üchün jédel kélip chiqqan.

Weqening yene bir xil wariyantida, bir Uyghur yash qimarxanida intayin köp pul utuwalghan bolghachqa xitay xojayin pul bérishni ret qilghan. Netijide Uyghur yashlar bilen qimarxana xojayini arisida jédel kélip chiqqan.

Xewerde neqil qilishiche, li weqedin kéyinki héssiyatini bayan qilip: "Biz Uyghurlar ikki xitayni pichaq tiqip öltürüptu, Uyghurdin biri ölüptu, dep anglap bek qorqup kettuq. Shundaq biz xenzular qorqqantuq. Biz u chaghda peqet Uyghurlarning xitaylarni öltürgenlikinila anglap bek jiddiyliship kettuq. Biz bek qorqup kettuq. Hazir bilsek bu bir jinayi ishlar délosi iken. Ishlar hazir normallashti" dégen.

Xitay da'iriliri jüme küni élan qilghan xewiride weqede 4 adem ölgenliki, 8 adem yarilan'ghanliqini bildürdi. Emma, ölgen we yarilan'ghanlarning kimliki we bularning ölüshidiki tepsilatlarni ashkarilimidi.

Bezi Uyghurlar ölgenlerning hemmisi Uyghur bolushi mumkinliki, ularning saqchilar teripidin étip öltürülgen bolushimu mumkinlikni ilgiri sürüshmekte.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet