Ikki yighinda bezi wekiller Uyghur rayonidiki köz tonush téxnikisini xitay miqyasigha kéngeytish teklipi bergen

Muxbirimiz erkin
2018-03-19
Share

Xitay xelq qurultiyining yéqinda chaqirilghan memliketlik yighinida bezi wekiller Uyghur rayonida yolgha qoyulghan köz tonush téxnikisini xitayning memliket miqyasigha kéngeytip, kimlik tonush sistémisigha kirgüzüsh teklipi bergen. Lékin, bu tedbir kishilik hoquq teshkilatlirining tenqidige uchrap keldi. Ular, eger xitaygha dawamliq yol qoyulsa, uning Uyghur rayonidiki bu tedbirlirining bashqa jaylargha kéngiyidighanliqini agahlandurup kelgen idi.

Xitay "Yer shari waqti géziti" ning xewiride ashkarilishiche, mezkur teklip layihesi bu qétimqi yighinda xitay xelq qurultiyining 28 neper wekili teripidin otturigha qoyulghan. Teklip layiheside köz tonush téxnikisining ijtima'iy parawanliq kartisi, pasport we kimlik kartida omumyüzlük ishlitishi telep qilin'ghan.

Bu téxnika eng burun Uyghur aptonom rayonida yolgha qoyulghan bolup, u kimlik béjirish, banka hésab nomuri échish, pasport élish, nopus deptiri, ijtima'iy parawanliq kartisi, pénsiye guwahnamisi, shopurluq kinishkisi élish qatarliqlar nurghun sahelerde yolgha qoyulup kelgen idi.

Kishilik hoquq teshkilatlirining bildürüshiche, Uyghur rayoni xitayning yuqiri téxnika arqiliq puqralarni kontrol qilishning sinaq meydani bolup qalghan. Ular Uyghurlarning qan tipi, d n a ewrishkisi, köz we chiray tonush, barmaq izi we bashqa shexsiy uchurlirini toplap, bi'ologiyelik uchur ambiri qurghan.

Xitay hökümiti yene kishilerning ish herikiti we pikirige qarap nomur qoyidighan ijtima'iy krédit sistémisi qurup, nomuri ölchemge toshmighan kishilerning ayropilan'gha olturushi yaki bezi ijtima'iy heq-hoquqlardin behrimen bolushini chekligen. Lékin kishilik hoquq teshkilatliri b u tedbirlerning xelq'ara kishilik hoquq ölchemlirige xilap ikenlikini agahlandurghan kelgen idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.