Даириләр уйғурларниң қаршилиқи күчлүк болған хотәндә йәнә көч көрситип һәйвә қилди

Мухбиримиз меһрибан
2017-04-04
Share

Хитай даирилириниң 3-апрел дүшәнбә күни хотәндә өткүзгән нәччә миң кишилик қораллиқ сақчиниң шәһәр кочилирида шоар товлап хәлққә һәйвә көрситиши диққәт қозғиди.

Мәзкур һәрикәт бу йил 14-феврал хотән гумида йүз бәргән пичақлиқ һуҗум вәқәсидин кейин, даириләр үрүмчи, қәшқәр,хотән қатарлиқ шәһәрләрдә бирла вақитта өткүзгән 27-феврал үрүмчи 10 миң кишилик маневири, 28-феврал қәшқәр, хотәнләрдики нәччә миң кишилик маневирдин кейинки йәнә бир қетимлиқ зор көләмлик күч көрситиш һәрикити һесаблинидикән.

Чәтәлләрдики уйғур паалийәтчилири вә вәзийәт анализчилириниң қаришичә, даириләрниң хотәндә, бу хил маневирлар арқилиқ йәрлик хәлққә һәйвә көрситишигә, хотәндә диярида йеқинқи йилларда барғанчә көпәйгән хитай сақчилири вә һөкүмәт хадимлириға һуҗум қилиш вәқәлири, үрүмчи қатарлиқ шәһәрләрдә йүз бәргән уйғурларниң қаршилиқ һәрикәтлиридә хотәнликләрниң барлиқи вә хитай һөкүмитиниң диний, миллий зулумлиридин қечип, шәрқий җәнуби асия әллири арқилиқ қанунсиз йоллар билән чәтәлләргә чиқип кетишкә мәҗбур болған уйғурларниң арисида хотәнликләрниң нисбәтән көп болуши қатарлиқ һәр хил амиллар сәвәб болған.

Радийомиз қатарлиқ хәлқара таратқуларда ениқланған әһваллардин мәлум болушичә, хотәнниң гума, қарақаш наһийилиридә йеқинқи йилларда хитай сақчилириға қарши һуҗум вәқәлири нисбәтән көп йүз бәргән. Булардин бултур 9-айда йүз бәргән гума сақчихана башлиқи ғәйрәт мамутниң гәмидә партлап өлүш вәқәси, бултур 28-декабир қарақашта йүз бәргән сақчиханиға һуҗум қилиш вәқәси вә уйғур диярида йүз бәргән тәсири чоң қаршилиқ вәқәлиридин 2014-йили 22-майдики үрүмчи әтигәнлик базарға һуҗум қилиш вәқәсидә хотән лоп наһийиси көк терәк йезисидики уйғур яшлири бар иди.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт