Da'iriler Uyghurlarning qarshiliqi küchlük bolghan xotende yene köch körsitip heywe qildi

Muxbirimiz méhriban
2017-04-04
Share

Xitay da'irilirining 3-aprél düshenbe küni xotende ötküzgen nechche ming kishilik qoralliq saqchining sheher kochilirida sho'ar towlap xelqqe heywe körsitishi diqqet qozghidi.

Mezkur heriket bu yil 14-féwral xoten gumida yüz bergen pichaqliq hujum weqesidin kéyin, da'iriler ürümchi, qeshqer,xoten qatarliq sheherlerde birla waqitta ötküzgen 27-féwral ürümchi 10 ming kishilik manéwiri, 28-féwral qeshqer, xotenlerdiki nechche ming kishilik manéwirdin kéyinki yene bir qétimliq zor kölemlik küch körsitish herikiti hésablinidiken.

Chet'ellerdiki Uyghur pa'aliyetchiliri we weziyet analizchilirining qarishiche, da'irilerning xotende, bu xil manéwirlar arqiliq yerlik xelqqe heywe körsitishige, xotende diyarida yéqinqi yillarda barghanche köpeygen xitay saqchiliri we hökümet xadimlirigha hujum qilish weqeliri, ürümchi qatarliq sheherlerde yüz bergen Uyghurlarning qarshiliq heriketliride xotenliklerning barliqi we xitay hökümitining diniy, milliy zulumliridin qéchip, sherqiy jenubi asiya elliri arqiliq qanunsiz yollar bilen chet'ellerge chiqip kétishke mejbur bolghan Uyghurlarning arisida xotenliklerning nisbeten köp bolushi qatarliq her xil amillar seweb bolghan.

Radiyomiz qatarliq xelq'ara taratqularda éniqlan'ghan ehwallardin melum bolushiche, xotenning guma, qaraqash nahiyiliride yéqinqi yillarda xitay saqchilirigha qarshi hujum weqeliri nisbeten köp yüz bergen. Bulardin bultur 9-ayda yüz bergen guma saqchixana bashliqi gheyret mamutning gemide partlap ölüsh weqesi, bultur 28-dékabir qaraqashta yüz bergen saqchixanigha hujum qilish weqesi we Uyghur diyarida yüz bergen tesiri chong qarshiliq weqeliridin 2014-yili 22-maydiki ürümchi etigenlik bazargha hujum qilish weqeside xoten lop nahiyisi kök térek yézisidiki Uyghur yashliri bar idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet