Uyghur diyaridiki siyasiy basturushning téximu zor kölemde dawam qilishi texmin qilinmaqta

Muxbirimiz eziz
2019-01-01
Élxet
Pikir
Share
Print

Xitay hökümiti idiyiwi sahege baghlap ijra qiliwatqan basturush siyasitining yenimu uzaq mezgil we kölem da'iriside dawam qilidighanliqi Uyghur aptonom rayonluq siyasiy kéngesh namida chaqirilghan yéngi yilliq chay ziyapitide yene bir qétim otturigha qoyuldi.

"Tengritagh" torining 30-dékabirdiki xewiride éytilishiche, Uyghur aptonom rayonluq siyasiy kéngeshning teshkillishidiki yéngi yilliq chay ziyapitige qatnashqan Uyghur aptonom rayonluq partiye komitétining sékrétari chén chu'en'go yighin qatnashquchiliri qataridin orun alghan isma'il tiliwaldi, shöhret zakir qatarliq bir qisim yuqiri derijilik rehberlerning aldida uzun siyasiy nutuq sözligen. U sözide 2018-yili shi jinping rehberlikidiki xitay kompartiyisi merkiziy komitétining rehberlikide "Shinjang xizmiti yighinlirining rohi yaxshi ijra bolghanliqi, merkezning shinjangni idare qilish istratégiyeside zor ghelibiler qolgha kelgenliki, bularning hemmisi shi jinpingning 'rolni yaxshi tutqanliqi' ning paydisi ikenliki" alahide tekitlen'gen. 

Chén chu'en'go sözining axirida 2019-yili xitay xelq jumhuriyiti qurulghanliqining 70 yilliq xatirisi ikenlikini, shuningdek pütkül rayon miqyasida ijtima'iy muqimliqni algha sürüshtiki muhim bir yil ikenlikini, shuning üchün partiye merkiziy komitétining ümidini yerde qoymay "Üch hujum urushi", "Töt omumiy weziyet" istratégiyisi, "Beshni birleshtürüsh" orunlashturushi qatarliqlarni yaxshi ijra qilip, xitay xelq jumhuriyiti qurulghanliqining 70 yilliqini utuqluq kütüwélishni otturigha qoyghan. 

Analizchilar bu heqte pikir qilip "Xitay hökümitining Uyghurlar diyaridiki bash emeldari bolghan chén chu'en'goning yéngi yil harpisida mushundaq söz qilishi 2019-yilida Uyghurlar diyaridiki siyasiy weziyetning téximu qattiq bolidighanliqidin bérilgen bésharet" déyishmekte.

Toluq bet