Lagérdin qoyup bérilgen Uyghur ayalning pakistanliq éri lagérdiki xorlashlarni ashkarilidi

Muxbirimiz erkin
2018-12-07
Élxet
Pikir
Share
Print

Xitayning yighiwélish lagéridin qoyup bérilgen bir Uyghur ayalning pakistanliq éri zahérudin b b s gha lagérdiki kishilik hoquq depsendichiliklirini ashkarilidi. Sabiye isimlik bu Uyghur ayalning yoldishigha éytip bérishiche, uninggha lagérda nurghun "Gheyri islamiy" terbiye élip bérilghan we u éghir xorlashqa uchrighan. Sabiye pakistanliqqa yatliq bolghanliqi üchün lagérgha qamalghan bir qanche yüz Uyghur ayaldin hazirgha qeder qoyup bérilgenliki melum bolghan sanaqliq kishilerdin biri.

Xitay hökümitining ötken yili pakistanliqqa yatliq bolghan nurghun Uyghur ayallirini tutqun qilip, lagérlargha qamishi, ularning erlirining qattiq naraziliqini qozghighan. Ular pakistan hökümitining bu ishqa arilishishini telep qilghan idi. Sabiyening qaysi lagérda yatqanliqi, qachan, qandaq qoyup bérilgenliki we hazirqi ehwali melum emes. Uning pakistanliq yoldishi zahérudin b b s urdu tili programmisining muxbirlirigha bergen uchurida, sabiyening uninggha lagérdiki emeldarlar uning pütün kiyimini yeshtürüp, ularning aldida qip-yalingach turushqa mejburlighanliqi, uning nomus qilishigha yol qoyulmaydighanliqini éytip bergenlikini bildürgen. Zahérudin yene lagérning tamiqi islamda cheklen'gen bolsimu, biraq sabiyening ach qalmasliq üchün amalsiz yégenlikini bildürgen. Uning qeyt qilishiche, lagérdiki emeldarlar sabiyening bu tamaqni tilep élishi we kompartiyege minnetdarliqini bildürishini telep qilidiken. U yene da'irilerning lagérdiki ayallarni qisqa kopta kiydürüp usul meshq qilishqa mejburlighanliqi, qarshiliq qilghanlarning xorlashqa uchrighanliqini bildürgen. 

B b s ning xewiri dunyaning diqqitini mezkur rayondiki lagérghlargha merkezleshken bir waqitta élan qilindi. Sabiye lagérdiki qorqunchliq kechmishi xelq'ara taratqularda élan qilin'ghan sanaqliq shahitlarning biri. Yéqinda xitayning cherchendiki bir yighiwélish lagérida yétip chiqqan Uyghur qizi méhrigül tursun amérika dölet mejliside guwahliq bérip, sabiyege oxshash bayanlarda bolghan idi.

Amérika tashqi ishlar ministirliqi emeldarlirining bildürishiche, nöwette bu lagérlarda 800 mingdin 2-3 milyon'ghiche Uyghur we bashqa musulman az sanliq milletler tutup turulmaqta iken. 5‏-Dékabir küni b d t ning kishilik hoquq komissari méshil bashélit, bu lagérlarda tekshürüsh élip bérishning charisini izdewatqanliqini bildürgen idi.

Toluq bet