"Yéngi shefeq" géziti: "Lagérlar lagér emes, iskenje merkezliridur"

Muxbirimiz erkin
2018-12-10
Élxet
Pikir
Share
Print

Türkiyediki "Yéngi shefeq" gézitining in'glizche sani bügün Uyghurlar heqqide xewer bérip, xitay yighiwélish lagérlirining "Ölümdinmu better iskenje merkezliri" ikenlikini ilgiri sürgen. Xewerde türkiyediki ikki Uyghur musapir ayal ziyaret qilinip, ularning yurtidiki perzentlirining we a'ile ezalirining chékiwatqan azabliri tonushturulghan.

Erdoghan hökümitige yéqin bu gézitning prézidént erdoghan Uyghur kishilik hoquq depsendichilikige süküt qilish bilen eyibliniwatqan bir waqitta bu xewerni élan qilishi diqqet qozghidi.

Yéqinda türkiye parlaméntining re'isi binali yildirim xitayni ziyaret qilip, xitay bash ministiri li kéchyang, xitay xelq qurultiyining bashliqi li jenshu bilen körüshken. Türk taratqulirining ilgiri sürüshiche, u li kéchyang we li jenshugha "Uyghurlardiki da'éshqa chétishliq guruhlarni türkiyeningmu oxshashla 'térrorluq teshkilat' dep qobul qilidighanliqi, uninggha qarshi qet'iy küresh qilidighanliqi" ni bildürgen. Binali yildirimning xitay ziyariti ijtima'iy taratqularda xéli zor ghulghula qozghighan idi.

"Yéngi shefeq" géziti türkiyede turushluq dilnur enwer, rabiyegül isimlik ikki Uyghur musapir ayalni ziyaret qilghan. 5 Yashliq bir qizi bilen türkiyede yashawatqan dilnur enwerning bildürüshiche, xitay hökümiti uning qeshqerdiki ata-anisini görüge tutuwélip, uning 4 we 7 yashliq ikki balisi we pütün uruq-tughqanliri bilen bolghan alaqisini üzüp tashlighan. Xitayning pilanliq tughut siyasitige xilapliq qilish bilen eyiblinip 7 yil türmide yétip chiqqan rabiyegülning bildürüshiche, "Eger u türkiyege qéchip chiqmighan bolsa, lagér dep atalghan iskenje merkizige qamilishi" éniq iken. U "Nurghun tughqanlirining bu lagérlarda tutup turuluwatqanliqi" ni bildürüp, bu lagérlar "Kirgen haman derhal basqunchiliqqa uchraydighan iskenje merkizi" dégen. Bu bir guwahchining tunji qétim lagérlarda ayallargha basqunchiliq qilinidighanliqini ilgiri sürüshidur. Xitay hökümiti bu lagérlar heqqidiki her xil eyibleshlerni ret qilip, bu orunlarda "Ashqunluq késilini yuqturuwalghanlargha kespiy terbiye" élip bérilidighanliqini ilgiri sürüp keldi.

Toluq bet