Хитай һөкүмити лагерлардики екскурсийә паалийитини давам қилдурмақта

Мухбиримиз әзиз
2019.03.12

Уйғурлар дияридики милйонлиған уйғурниң лагерларға солиниши һәрқайси ахбарат васитилиридә вә һөкүмәтләрниң йиғинлирида көпләп тәкитләнгәндин кейин хитай һөкүмити бир түркүм екскурсийә өмики тәшкилләп, уйғурлар дияриниң һәрқайси җайлиридики аталмиш “тәрбийәләш мәркәзлири” ни зиярәт қилдурған иди.

Өткән һәптә алҗирийә, маракәш, сингапор, венгирийә, әрәб иттипақиниң хитайдики вәкили қатарлиқлардин тәшкилләнгән йәнә бир түркүм чәтәл дипломатлар өмики уйғурлар диярида зиярәттә болған.

Хитай һөкүмитиниң авази болған шинхуа агентлиқиниң 11-марттики хәвиридә ейтилишичә, вәкилләр өмики алди билән үрүмчидики “бүйүк базар” ни зиярәт қилған. Шундақла зораванлиқ вә террорлуқ вәқәлири көргәзмисини көргән. Улар қәшқәрдики “кәспий тәрбийәләш мәркизи” дә курсантларниң қанун билимлири өгиниватқанлиқини көргән. Курсантлардин мирадил йүсүп өмәктикиләргә илгири өзиниң диний әсәбийлик билән юқумланғанлиқини, җүмлидин “хәлқ пули” ни “капирниң пули”, дәп тәрк әткәнликини, һазир болса бу хил тәрбийәләш арқилиқ буниңдин халас болғанлиқини сөзләп бәргән.

Шинхуа агентлиқи бу һәқтики хәвиридә мәзкур екскурсийә өмики әзалириниң “тәсиратлири” ни көпләп баян қилған. Җүмлидин өмәктикиләрниң һәрқайси җайлардики мәһәллә комитетлириниң алтә яштин кичик балиларға һәр күни бир қаптин һәқсиз сүт тарқитидиғанлиқини көрүп “сүтни балиларниң қолиға, муһәббәтни балиларниң қәлбигә йәткүзидикән” дегәнликини тәшвиқ қилған.

Һалбуки анализчилар мәзкур өмәктикиләрниң асасән хитай һөкүмитиниң сизған сизиқидин чиқмайдиған дөләтләрдин кәлгәнликини тәкитләш билән биргә, хитай хәвәрлиридики вәкилләрниң сөзлириниң раст-ялғанлиқи һәққидә зор гуманлар мәвҗутлуқини тәкитлиди. Шундақла хитай ахбаратида йеңи зеландийәниң сабиқ баш министири җенний шиплей ағзидин берилгән баянларни кейинчә җенний ханимниң “мән һечқачан ундақ демигән” дәп инкар қилғанлиқини буниңға мисал қилип көрсәтти.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.