Uyghur diyardiki lagérlar heqqide eng yéngi istatéskiliq melumatlar ashkara bolmaqta

Muxbirimiz sada
2018-09-26
Élxet
Pikir
Share
Print

Uyghur diyaridiki yighiwélish lagérlirini yéqindin közitip kéliwatqan kanadadiki biritaniye kolombiyesi uniwérsitétning qanun oqughuchisi shawin jang 24-séntebir tiwéttirigha chaplighan uchurida hazirghiche bayqalghan lagérlarning sani we uning ichide tutup turuluwatqan tutqunlarning sani heqqidiki yéngi melumatlirini élan qilghan.

Shawin jangning ilgiri sürüshiche, u hazirgha qeder éniqlap békitken lagérlarning sani 50 tin artuq iken. Bu lagérlarning kölimi nechche yüz kwadrat métirdin nechche onming kwadrat métirghiche kélidiken. U tiwéttérgha yollighan uchurida yene özining Uyghur aptonom rayonidiki 105 sheher we nahiyedin peqet 25 nahiye we sheherdiki lagérlarnila tekshürüp körgenlikini, buning tutup turush orunlirini öz ichige almaydighanliqini eskertken. U özi tekshürgen melumatlargha asaslinip, peqet lagérlargha qamalghuchilar sanining bir milyon'gha yétidighanliqi heqqidiki perizini otturigha qoyghan.

Atalmish "Qayta özgertip-terbiyelesh merkezliri", yeni yighiwélish lagérliri heqqide yuqiriqidek yéngi istatéskilarning élan qilinishi we uninggha solan'ghan tutqunlar sanining künsayin éship bérishigha egiship, nurghunlighan kichik balilarning qaranchuqsiz we ata-ana muhebbitidin mehrum qélip, xitay da'iriliri tesis qilghan chirayliq namlardiki balilar lagérliri, yeni daril'étamlargha élip kétilgenliki melum bolmaqta.

Yéqinda ündidar arqiliq ashkara bolghan bir uchurgha qarighanda, qeshqer shehiridiki nurghunlighan ata-anilar lagérlargha élip kétilgen bolghachqa qaranchuqsiz qalghan balilar jismaniy we psixikiliq jehetlerdin zerbige uchrap, pütkül jem'iyette qorqunch we meniwi krizis keltürüp chiqarghan. Mezkur uchurda ata-aniliridin ayrilip boyni qisilghan balilargha ige chiqish chaqiriq qilin'ghan.

Mutexessislerning bildürüshiche, bundaq éghir weziyet Uyghur diyaridiki her qaysi sheher, nahiye we yézilarda künsayin omumlishishqa qarap yüzlenmektiken. Uyghur diyarida zor kölemdiki jaza lagérlirining qurulup, milyonlighan insanlarning bu jaylargha qamilishi san-sanaqsiz a'ililerge we balilargha éghir ijtima'iy mesililerni keltürüp chiqarmaqtiken.

Toluq bet