Yél uniwérsitétida lagérlar mesilisi tonushturuldi
2019.01.29
2005-Yilidin buyan b d t her yilining 27-yanwar künini “Xelq'ara qirghinchiliqni xatirilesh küni” qilip békitken bolup, shuningdin béri mushu künde ikkinchi dunya urushida ziyankeshlikke uchrighan yehudiylarning paji'esi eslep kélinmekte. Bu yilmu mushu xatire künning etisi, yeni 28-yanwar küni amérikidiki eng meshhur aliy mekteplerning biri bolghan yél uniwérsitétining qanunchiliq mektipide xitay hökümitining milyonlap Uyghurni lagérlargha qamishi hemde buninggha alaqidar mesililer heqqide muhakime yighini ötküzüldi.
Bu qétimqi muhakime yighinigha “Xitayning musulmanlarni zor sanda lagérgha qamishi hemde ziyankeshlik qilishi: bu xil insan heqliri krizisigha qandaq inkas qayturush lazim?” dep mawzu qoyulghan. Bu qétimqi muhakime yighinigha washin'gton shehiridiki Uyghur pa'aliyetchi nuriy türkel, “Insan heqlirini közitish teshkilati” xitay ishliri bölümining mudiri sofi richardson, “Washin'gton pochtisi” gézitining kespiy yazghuchisi émiliy rawxala ayrim-ayrim söz qilip, lagérlar mesilisining kélip chiqishi, buning hazirqi ehwali hemde buninggha dunyaning qandaq mu'amilide bolushi qatarliq mesililer heqqide öz qarashlirini otturigha qoydi.
Melum bolushiche, bu xil aliy bilim yurtlirida Uyghurlar mesilisining anglitilishi xelq'ara jama'etning Uyghurlarni qollishini qolgha keltürüshte zor ehmiyetke ige iken.