Хитай һөкүмити йәнә бир қатар дөләтләрниң дипломатлирини уйғур елидики лагерларни зиярәт қилишқа орунлаштурған

Мухбиримиз ирадә
2019-02-21
Елхәт
Пикир
Share
Принт

Хитай һөкүмити уйғур елидики лагерлар мәсилисидә америка қатарлиқ ғәрб әллириниң күчлүк тәнқидигә учриғандин кейин, өзиниң уйғурларни бастуруш һәрикитини ақлаш үчүн паал һәрикәткә өткән вә бултур 12-айдин етибарән пакистан, һиндистан, һиндонезийә қатарлиқ дөләтләрниң дипломатлирини вә бир қисим мухбирларни қәшқәр, хотән, атуш қатарлиқ шәһәрләрдики «қайта тәрбийәләш мәркәзлири» ни зиярәт қилишқа тәшкиллигән иди.

Ройтерс агентлиқиниң 21-феврал күнидики хәвиридин қариғанда, хитай ташқи ишлар министирлиқи һазирғичә кәм дегәндә 3 қетим юқиридикидәк зиярәтләрни орунлаштурған. Техи мушу сәйшәнбә күни пакистан, венсуела, куба, мисир, камбоджа, русийә, сенегал вә беларусийә қатарлиқ дөләтләрниң җәнвәдә турушлуқ дипломатлири уйғур елидики аталмиш «қайта тәрбийә лагерлири» дики зиярәтлирини аяғлаштурған.

Ройтерс агентлиқиниң мәлум дипломатик мәнбәләрдин игилишичә, хитай 4-түркүмдә сәуди әрәбистан, алҗирийә, маракәш, ливан, мисир, сингапор, вийетнам, лаос, бирма, камбоджа, баңладиш, русийә, түркмәнистан, гирузийә, һонгарийә вә гиретсийә қатарлиқ дөләтләрниң бейҗиңда турушлуқ дипломатлирини зиярәткә тәклип қилған. Уларниң зияритиниң келәр һәптә ичидә болидиғанлиқи мәлум икән. Бирақ юқириқи бәзи дөләтләрниң мунасивәтлик хадимлири ройтерс агентлиқиниң бу зиярәт һәққидики соаллирини җавабсиз қойған. Ливан ташқи ишлар министирлиқидики мәлум бир мәнбә ройтерс агентлиқиға ливанниң бу зиярәткә қатнашмайдиғанлиқини ейтқан. Гирузийә ташқи ишлар министирлиқиниң ахбарат ишханиси болса гирузийә дипломатлириниң һәқиқәтән тәклип тапшуруп алғанлиқини, әмма буниңға қатнишалмайдиғанлиқини билдүргән.

Бейҗиңда турушлуқ йәнә бир дипломат исмини ашкарилимаслиқ шәрти билән қилған сөзидә хитайниң һазир башқа ислам әллириниңму лагер мәсилисидә түркийә билән ортақ сәптә йәр елишидин әндишә қиливатқанлиқини билдүргән.

Дипломатик мәнбәләр ройтерсқа қилған сөзидә «хитай һазир уйғур елидики лагерлар мәсилисигә қозғиливатқан наразилиқ инкасидин, болупму америкиниң буниңға җаза тәдбири қоюшидин қаттиқ әндишиләнмәктә. Шуңа улар буниңға қарши туруш үчүн хитайға бәкрәк достанә бир пикир еқимини алға сүрмәкчи болуватиду», дегән.

Пикирләр (0)
Share
Толуқ бәт