Xitay hökümiti yene bir qatar döletlerning diplomatlirini Uyghur élidiki lagérlarni ziyaret qilishqa orunlashturghan

Muxbirimiz irade
2019-02-21
Élxet
Pikir
Share
Print

Xitay hökümiti Uyghur élidiki lagérlar mesiliside amérika qatarliq gherb ellirining küchlük tenqidige uchrighandin kéyin, özining Uyghurlarni basturush herikitini aqlash üchün pa'al heriketke ötken we bultur 12-aydin étibaren pakistan, hindistan, hindonéziye qatarliq döletlerning diplomatlirini we bir qisim muxbirlarni qeshqer, xoten, atush qatarliq sheherlerdiki "Qayta terbiyelesh merkezliri" ni ziyaret qilishqa teshkilligen idi.

Roytérs agéntliqining 21-féwral künidiki xewiridin qarighanda, xitay tashqi ishlar ministirliqi hazirghiche kem dégende 3 qétim yuqiridikidek ziyaretlerni orunlashturghan. Téxi mushu seyshenbe küni pakistan, wénsu'éla, kuba, misir, kambodzha, rusiye, sénégal we bélarusiye qatarliq döletlerning jenwede turushluq diplomatliri Uyghur élidiki atalmish "Qayta terbiye lagérliri" diki ziyaretlirini ayaghlashturghan.

Roytérs agéntliqining melum diplomatik menbelerdin igilishiche, xitay 4-türkümde se'udi erebistan, aljiriye, marakesh, liwan, misir, sin'gapor, wiyétnam, la'os, birma, kambodzha, bangladish, rusiye, türkmenistan, giruziye, hon'gariye we girétsiye qatarliq döletlerning béyjingda turushluq diplomatlirini ziyaretke teklip qilghan. Ularning ziyaritining kéler hepte ichide bolidighanliqi melum iken. Biraq yuqiriqi bezi döletlerning munasiwetlik xadimliri roytérs agéntliqining bu ziyaret heqqidiki so'allirini jawabsiz qoyghan. Liwan tashqi ishlar ministirliqidiki melum bir menbe roytérs agéntliqigha liwanning bu ziyaretke qatnashmaydighanliqini éytqan. Giruziye tashqi ishlar ministirliqining axbarat ishxanisi bolsa giruziye diplomatlirining heqiqeten teklip tapshurup alghanliqini, emma buninggha qatnishalmaydighanliqini bildürgen.

Béyjingda turushluq yene bir diplomat ismini ashkarilimasliq sherti bilen qilghan sözide xitayning hazir bashqa islam elliriningmu lagér mesiliside türkiye bilen ortaq septe yer élishidin endishe qiliwatqanliqini bildürgen.

Diplomatik menbeler roytérsqa qilghan sözide "Xitay hazir Uyghur élidiki lagérlar mesilisige qozghiliwatqan naraziliq inkasidin, bolupmu amérikining buninggha jaza tedbiri qoyushidin qattiq endishilenmekte. Shunga ular buninggha qarshi turush üchün xitaygha bekrek dostane bir pikir éqimini algha sürmekchi boluwatidu", dégen.

Toluq bet