En'gliye hökümiti lagérlar mesiliside xitay hökümitige yene bir qétim chaqiriq qildi

Muxbirimiz eziz
2019-03-19
Élxet
Pikir
Share
Print

Yéqinda ötküzülgen b d t yighinida xitay hökümiti en'gliye hökümiti tewsiye qilghan üch türlük teklipni ret qilghan idi. En'gliye hökümiti bu munasiwet bilen xitay hökümitige chaqiriq qilip, uni "Xelq'ara emgek teshkilati" ning mejburiy emgek ehdinamisige ri'aye qilishqa chaqirdi.

Büyük biritaniye we shimaliy irélandiye birleshme padishahliqi hökümitining tor bétide élan qilin'ghan bu chaqiriqta xitay hökümitining sunulghan tekliplerni qobul qilmighanliqidin tolimu ökün'genlik bildürülgen. Bu chaqiriqta: "Xitayning barliq shekillerdiki irqiy kemsitishni tügitish toghrisida bérilgen tekliplerni qobul qilmighanliqidin bekmu epsusluq hés qilimiz" déyilidu. Shuningdek Uyghurlar diyaridiki musulmanlar ammisining nöwettiki derdining özlirini bekmu zor endishige séliwatqanliqi éytilidu.

Bu chaqiriqta xitay hökümitini tutqun qilinip lagérlargha élip kétilgen bigunah Uyghurlarni qoyuwétish, Uyghurlarning yürüsh-turush erkinlikini chekleshni bikar qilish hemde ötken besh yil ichide tutqun qilin'ghanlarning sanini élan qilishqa chaqirish bilen birge uni xelq'araliq ehdinamilerge ri'aye qilishqa dewet qilinidu.

Shuning bilen bir waqitta en'gliye parlaméntining shotlandiyelik ezasi alistayir karmaykil 19-mart küni "Shotlandiyelikler" torida mexsus maqale élan qilip xitay hökümitining milyonlarche Uyghurni lagérlargha qamap ularning méngisini yuyush bilen meshghul boluwatqanliqi, nöwette mejburiy xaraktérdiki ichki eza sodisining qamaqtiki bu tutqunlarning béshigha kéliwatqanliqini eskertip: "Dunya jama'iti, shundaqla en'gliye hökümiti bu xil wehshilikke qarap oltursa qet'iy bolmaydu" dep körsetti.

Toluq bet