Sayragül sawutbayning qazaqistan sotidiki guwahliqi xitayni "Yighiwélish lagérliri" mesiliside osal ehwalgha chüshürüp qoydi

Muxbirimiz erkin
2018-07-17
Élxet
Pikir
Share
Print

Qazaqistanning alma-ata oblastidiki bir sot mehkimisi düshenbe küni xitayning Uyghur rayonidiki yighiwélish lagérining sabiq xadimi sayragül sawutbayni sotlap, uning lagérlar heqqidiki guwahliq sözlirini anglighan.

Bu hazirgha qeder yighiwélish lagérida ishligen bir sabiq xitay hökümet xadimining tunji qétim bir chet'el sot mehkimiside lagérlar heqqide guwahliq bérishidur. Sayragül sawutbay ilgiri Uyghur rayonidiki melum bir yighiwélish lagérida ishligen.

Xitay da'iriliri uning chet'elge chiqip, qazaqistandiki ikki balisi we éri bilen jem bolushini ret qilghachqa qazaqistan'gha qéchip chiqqan. Lékin qazaqistan bixeterlik organliri uni tutqun qilip, chégradin qanunsiz ötüsh bilen eyibligen idi.

Firansiye agéntliqining xewer qilishiche, 41 yashliq sayragül sawutbay düshenbe küni sotta guwahliq bérip, özining yighiwélish lagérida ishlesh jeryanida yighiwélish lagérigha a'it nurghun mexpiy höjjetlerni körgenliki, özi ishligen lagérda 2500 neper qazaqning tutup turuluwatqanliqini bildürgen. U lagérni teswirlep, "Xitay bu orunlarni siyasiy lagér désimu, lékin emeliyette u tagh ichidiki bir türme idi" dégen.

Xitayning resmiy sanliq melumatlirida hazir Uyghur rayonida bir yérim milyondek qazaq yashaydu. Xitay da'irilirining nöwette qanchilik qazaq puqrasini bu lagérlargha qamighanliqi melum emes. Emma kishilik hoquq teshkilatlirining qeyt qilishiche, xitay hökümiti Uyghurlardin az dégende bir milyon kishini bu lagérlarda tutup turmaqta iken.

Sayragül sawutbay sotta yene "Özining sotta bu lagérlar heqqide ashkara toxtilip, xitayning dölet mexpiyetlikini ashkarilighanliqi, shunga qazaqistanning özini xitaygha qayturmasliqi" ni telep qilghan.

Chet'el axbarat wasitilirining bildürüshiche, sayragül sawutbayning lagérlar heqqidiki sözi xitayni osal ehwalgha chüshürüp qoyupla qalmay, xitay-qazaqistan munasiwetliri üchünmu bir sinaq iken. Qazaqistan ilgiri Uyghur rayonidiki qazaq puqralirining tutqun qilinip, yighiwélish lagérlirigha qamilish mesilisige süküt qilip, xitay bilen ashkara qarshilishishtin özige qachurup kelgen idi.

Sayragül sawutbayning sotigha xitay elchixanisining ikki xadimi qatnashqan bolsimu, biraq muxbirlarning so'allirigha jawab bérishni ret qilghan.

Toluq bet