Xitay milyonlighan Uyghurning yighiwélish lagérlirida tutup turuluwatqanliqini inkar qildi

Muxbirimiz erkin
2018-08-13
Élxet
Pikir
Share
Print

Xitay 13‏-awghust b d t irqiy ayrimichiliqqa qarshi turush komitétining yighinida bir milyon Uyghurning yighiwélish lagérlirida tutup turuluwatqanliqini inkar qildi, lékin atalmish "Diniy ashqunlarning azdurushigha uchrighan bezi kishilerge qayta-terbiye élip bériliwatqanliqi" ni ilgiri sürdi.

Düshenbe küni xitay kompartiyesi merkizi birliksep bölümining mu'awin bashliqi xu lyenxé irqiy ayrimichiliqqa qarshi turush komitétining Uyghur aptonom rayonidiki yighiwélish lagérlirigha da'ir so'allargha jawab bergende lagérlarning mewjutluqini pütünley inkar qilghan.

B d t irqiy ayrimichiliqqa qarshi turush komitéti 10‏-awghust künidiki yighinida xitayning bir milyon Uyghur we bashqa musulmanlarni yighiwélish lagérigha qamap, 2 milyondek kishini qayta-terbiyelesh lagérlirida tutup turuwatqanliqigha da'ir ishenchlik delillerge érishkenlikini bildürgen we xitay wekillirining buninggha jawab bérishini telep qilghan idi. Yighinda irqiy ayrimichiliqqa qarshi turush komitétining mu'awin re'isi gay mikdodogal xitayning "Diniy ashqunluqqa qarshi turush, ijtima'iy muqimliqni qoghdash namida Uyghur aptonom rayonini yighiwélish lagérlirini eslitidighan mexpiy lagérgha aylandurghanliqigha da'ir nurghun xewerlerdin qattiq endishe qiliwatqanliqi" ni tekitligen idi.

Roytérs agéntliqining ilgiri sürüshiche, xu lyenxé Uyghur aptonom rayonida barliq puqralarning hoquqi teng qoghdiliwatqanliqini ilgiri sürüp, "Bir milyon kishining qayta-terbiyelesh merkezlirige qamalghanliqigha da'ir pikirler toghra emes. Diniy étiqad erkinliki mesiliside shinjang puqralarning diniy-étiqad erkinlikini kapaletke ige qilip, normal diniy pa'aliyetlerni qoghdap keldi. . . Diniy ashqunluqning azdurushigha uchrighan kishilerge bolsa qayta orunlashturush we qayta terbiyelesh arqiliq yardem bérish lazim" dégen.

Yighinda gay mikdogal xitay wekillirige so'al qoyup, "Az sanliq milletlerning hoquqigha xilapliq qilmiduq déyish héchnémini ispatlimaydighanliqi, özlirining eyibleshni inkar qilishtin köprek melumatlargha éhtiyajliq" ikenlikini tekitligen. U yene "Méning bayqishimche, siler qayta-terbiyelesh yaki idiye özgertish programmisining élip bérilmaywatqanliqini inkar qilmaywatisiler," dégen.

Bu qétimqi yighinning aldida kishilik hoquq közitish teshkilati, d u q, xelq'ara kechürüm teshkilati qatarliq 20 dek xelq'ara ammiwiy teshkilat b d t gha doklat sunup, yighinda xitayning Uyghur aptonom rayonidiki lagérlar mesilisige jawab bérishini telep qilghan. "Xitay kishilik hoquq himayichiliri" namliq teshkilat b d t gha sun'ghan doklatida lagérlardiki Uyghurlarning 3 milyon'gha yétidighanliqini bildürgen idi.

Toluq bet