Хитай һөкүмитиниң лагерларни инкар қилиши хәлқарада зор ғулғула қозғиди

Мухбиримиз әзиз
2018-08-14
Елхәт
Пикир
Share
Принт

Уйғурлар дияридики сиясий бастурушта милйонлиған уйғурниң лагерларға соланғанлиқи аллиқачан пүтүн дуняға пур кәткәндә хитай һөкүмити бу әһвални ашкара инкар қилди.

13-Күни б д т қармиқидики «ирқий кәмситишни түгитиш комитети» җәнвә шәһиридә өткүзгән гуваһлиқ бериш йиғинида хитай һөкүмитиниң вәкиллири сөз қилип, уйғурлар дияридики лагерлар һәққидики хәвәрләрни «пүтүнләй ялған» деди.

С н н ниң 13-авғусттики хәвиридә ейтилишичә, хитай вәкиллиридин ху лйәнхе бу һәқтә сөз қилип, «уйғурлар вә башқа милләтләр һазир әркинлик вә һоқуқтин баравәр бәһримән болмақта» дегән. Шуниңдәк «дүшмән күчләр» ниң қәстән «йоқ йәрдин путақ чиқирип қара чаплаватқанлиқи» ни тәкитлигән. Шуниңдәк «у җайда силәр ейтиватқандәк һечқандақ лагер мәвҗут әмәс» дегән.

«Дәвр» журнилиниң 14-авғусттики мақалисидә көрситилишичә, хитай ташқи ишлар министирлиқиниң баянатчиси лү каң бу һәқтә мухбирларниң соаллириға җаваб берип, «хитайға қарши күчләр сиясий мәқсәттә ялған-явидақларни тоқуп бизгә һуҗум қилмақта» дегән.

Һалбуки, уйғурлар дияридики сиясий, мәдәнийәт, дин саһәлири, җүмлидин күндилик турмушниң һәр бир һалқисиғичә сиңип кәткән контроллуқниң милйонлиған уйғурни қайси дәриҗидики зулумға мәһкум қилғанлиқи һәққидә көплигән пакитлар вә гуваһчиларниң гуваһлиқи оттуриға чиққан әһвалдиму хитай һөкүмитиниң бундақ әһвал мәвҗут әмәс, дәп буниңдин тенивелиши хәлқарани бәкму һәйран қалдурғанлиқи мәлум. «Инсан һәқлирини көзитиш тәшкилати» ниң тәтқиқатчиси мая ваң бу һәқтә сөз қилип «әмәлийәттә, хитай һөкүмити уйғурларни халиғанчә қолға елиш һәмдә лагерларға охшаш қанунсиз әслиһәләргә қамап қоюшни изчил давам қилип келиватиду,» дегән.

«Вал стрет журнили»ниң мухбири җош чин бу мунасивәт билән елан қилған мақалисидә хитай һөкүмитиниң «биз бир қисим җинайәтчиләрни техника мәктәплиридә оқутуп, уларни һүнәрлик қилип қояйли дәватимиз. Әмма чәтәлләрдики дүшмән күчләр буни лагер, дәп әйиблимәктә,» дегәнликини тәкитләйду. Әмма бу һәқтә сөз қилған голландийәдики уйғур паалийәтчи абдуреһим ғени бу лагерларниң һазир шиддәт билән кеңийиватқанлиқини ейтип «хитай һөкүмити өзлиригә қарши сөз қилғанлики уйғурни мушу лагерларға солаватиду. Улар мушу йосунда уйғурларниң миллий кимликини пүтүнләй йоқатмақчи,» дегән.

Пикирләр (0)
Share
Толуқ бәт