Xitay hökümitining lagérlarni inkar qilishi xelq'arada zor ghulghula qozghidi

Muxbirimiz eziz
2018-08-14
Élxet
Pikir
Share
Print

Uyghurlar diyaridiki siyasiy basturushta milyonlighan Uyghurning lagérlargha solan'ghanliqi alliqachan pütün dunyagha pur ketkende xitay hökümiti bu ehwalni ashkara inkar qildi.

13-Küni b d t qarmiqidiki "Irqiy kemsitishni tügitish komitéti" jenwe shehiride ötküzgen guwahliq bérish yighinida xitay hökümitining wekilliri söz qilip, Uyghurlar diyaridiki lagérlar heqqidiki xewerlerni "Pütünley yalghan" dédi.

S n n ning 13-awghusttiki xewiride éytilishiche, xitay wekilliridin xu lyenxé bu heqte söz qilip, "Uyghurlar we bashqa milletler hazir erkinlik we hoquqtin barawer behrimen bolmaqta" dégen. Shuningdek "Düshmen küchler" ning qesten "Yoq yerdin putaq chiqirip qara chaplawatqanliqi" ni tekitligen. Shuningdek "U jayda siler éytiwatqandek héchqandaq lagér mewjut emes" dégen.

"Dewr" zhurnilining 14-awghusttiki maqaliside körsitilishiche, xitay tashqi ishlar ministirliqining bayanatchisi lü kang bu heqte muxbirlarning so'allirigha jawab bérip, "Xitaygha qarshi küchler siyasiy meqsette yalghan-yawidaqlarni toqup bizge hujum qilmaqta" dégen.

Halbuki, Uyghurlar diyaridiki siyasiy, medeniyet, din saheliri, jümlidin kündilik turmushning her bir halqisighiche singip ketken kontrolluqning milyonlighan Uyghurni qaysi derijidiki zulumgha mehkum qilghanliqi heqqide köpligen pakitlar we guwahchilarning guwahliqi otturigha chiqqan ehwaldimu xitay hökümitining bundaq ehwal mewjut emes, dep buningdin téniwélishi xelq'arani bekmu heyran qaldurghanliqi melum. "Insan heqlirini közitish teshkilati" ning tetqiqatchisi maya wang bu heqte söz qilip "Emeliyette, xitay hökümiti Uyghurlarni xalighanche qolgha élish hemde lagérlargha oxshash qanunsiz eslihelerge qamap qoyushni izchil dawam qilip kéliwatidu," dégen.

"Wal strét zhurnili"ning muxbiri josh chin bu munasiwet bilen élan qilghan maqaliside xitay hökümitining "Biz bir qisim jinayetchilerni téxnika mektepliride oqutup, ularni hünerlik qilip qoyayli dewatimiz. Emma chet'ellerdiki düshmen küchler buni lagér, dep eyiblimekte," dégenlikini tekitleydu. Emma bu heqte söz qilghan gollandiyediki Uyghur pa'aliyetchi abduréhim ghéni bu lagérlarning hazir shiddet bilen kéngiyiwatqanliqini éytip "Xitay hökümiti özlirige qarshi söz qilghanliki Uyghurni mushu lagérlargha solawatidu. Ular mushu yosunda Uyghurlarning milliy kimlikini pütünley yoqatmaqchi," dégen.

Toluq bet