Amérika taratquliri Uyghur élidiki lagérlarning b d t da otturigha qoyulushining zor ghelibe ikenlikini tekitlidi

Muxbirimiz irade
2018-08-16
Élxet
Pikir
Share
Print

15-Awghust küni, amérikida chiqidighan "Xaffington pochtisi" gézitide "Dunya xitayning bir milyondin artuq kishini yighiwélish lagérlirigha soliwalghanliqidin qandaq xewer tapti" mawzuluq bir parche maqale élan qilindi.

Maqalide bu hepte béshida birleshken döletler teshkilati kishilik hoquq mutexessislirining "Xitay bir milyondin artuq musulman az sanliq millet xelqini mexpiy halda lagérlargha qamidi" dep jakarlash arqiliq dunya axbaratining kün tertipini igiligenliki, xitay hökümiti özining bu qiliwatqanlirining dunyagha ashkarilinip ketmesliki üchün keng kölemlik we zalimlarche qamal qilish herikiti élip barghanliqini nezerde tutqanda, b d t ning yuqiridiki bu bildürgüsini herbir puqraning, zhurnalistlarning we herqaysi kishilik hoquq organlirining heqiqetni otturigha chiqirish üchün körsetken tirishchanliqining zor bir ghelibisi, dep qarashqa bolidighanliqi bayan qilin'ghan.

Maqalide Uyghur kishilik hoquq qurulushining tetqiqatchisi zubeyre xanim ziyaret qilin'ghan bolup, u sözide "Uyghurlar süküt qilish arqiliq bir netijige érishelmeydighanliqini hés qildi," déyilgen.

Maqalide xitay hökümitining ötken yilidin buyan mexpiy halda Uyghurlarni yighiwélish lagérlirigha qamash, chet'ellerdiki Uyghurlarghimu bésim ishlitish we ularning uchurini yighish qatarliq heriketlirini bashlighanliqi eskertip ötülgen.

Maqalida yene Uyghur élida yüz bergen bu éghir insan hoquqi depsendichiliklirining herqaysi xelq'ara axbarat organlirining zhurnalistliri teripidin xewer qilin'ghanliqi, "Erkin asiya radi'osi" muxbirlirining a'ile tawabi'atlirining tutqun qilin'ghanliq ehwalini ashkarilishi, kishilik hoquqni közitish teshkilati we bashqa kishilik hoquq mutexessislirining birdek küch chiqirishi netijiside axiri Uyghur rayonidiki éghir weziyetning dunya jama'etchilikige ashkarilan'ghanliqidek tepsilatlar bayan qilin'ghan.

Toluq bet