Америка һөкүмити: «йиғивелиш лагерлириға милйонлиған мусулман қамалған болуши мумкин»

Мухбиримиз әркин
2018-08-17
Елхәт
Пикир
Share
Принт

Америка һөкүмити америка ABC телевизийә қанилиниң мухбирлириға уйғур аптоном районидики йиғивелиш лагерлириға «милйонлиған аз санлиқ милләт мусулманлири қамалған болуши мумкинлики» ни билдүрүп, буниңдин қаттиқ чөчүватқанлиқини илгири сүргән.

ABC Қанилиниң хәвиридә қәйт қинишичә, америка ташқи ишлар министирлиқиниң бир әмәлдари «тутуп турулуватқан кишиләрниң сани милйонларчә болуши мумкин. Америка хитай һөкүмитиниң шинҗаң уйғур аптоном районидики уйғур, қазақ вә башқа мусулманларға қарита бастурушни күчәйтишидин қаттиқ әндишә қилмақта,» дегән.

Бу америка һөкүмитиниң муавин президент майк пәнстин кейин йәнә бир қетим уйғур районидики йиғивелиш лагерлириға қамалған тутқунлар саниниң милйонларчә икәнликини тәкитлишидур.

Б д т ирқий айримичилиққа қарши туруш комитетиниң йеқинда өткүзүлгән йиғинида бир милйондәк уйғурниң «ашқунлуққа қарши туруш мәркәзлири»дә вә 2 милйондәк кишиниң «қайта тәрбийәләш мәркәзлири» дә сиясий, мәдәнийәт җәһәтләрдә идийә өзгәртишкә мәҗбурлиниватқанлиқи оттуриға қоюлған иди. Лекин хитай вәкилләр өмики йиғивелиш лагерлириниң мәвҗутлуқини инкар қилған. Хитай ташқи ишлар министирлиқи буни «хитайға қарши күчләрниң яман ғәрәзлик бөһтани» дегән иди.

ABC Қанилиниң хәвиридә баян қилишичә, америка ташқи ишлар министирлиқиниң әмәлдари йәнә «аз санлиқ милләтләрниң өз мәдәнийити вә диний кимликини ипадилишигә қарита пәрқләндүрмәй туруп чекидин ашқан тәдбирләрни қоллиниш ашқунлиқ вә зораванлиққа йол ачиду,» дегән. Хәвәрдә кишилик һоқуқ тәшкилатлириниң трамп һөкүмитини қаттиқ баянат елан қилиштин башқа әмәлий тәдбирләрни елишқа чақириватқанлиқи, бу әмәлий тәдбирләрниң бириниң «йәр шари магнетиский қануни» ни ишқа селиш икәнликини билдүргән.

Пикирләр (0)
Share
Толуқ бәт