Amérika hökümiti: "Yighiwélish lagérlirigha milyonlighan musulman qamalghan bolushi mumkin"

Muxbirimiz erkin
2018-08-17
Élxet
Pikir
Share
Print

Amérika hökümiti amérika ABC téléwiziye qanilining muxbirlirigha Uyghur aptonom rayonidiki yighiwélish lagérlirigha "Milyonlighan az sanliq millet musulmanliri qamalghan bolushi mumkinliki" ni bildürüp, buningdin qattiq chöchüwatqanliqini ilgiri sürgen.

ABC Qanilining xewiride qeyt qinishiche, amérika tashqi ishlar ministirliqining bir emeldari "Tutup turuluwatqan kishilerning sani milyonlarche bolushi mumkin. Amérika xitay hökümitining shinjang Uyghur aptonom rayonidiki Uyghur, qazaq we bashqa musulmanlargha qarita basturushni kücheytishidin qattiq endishe qilmaqta," dégen.

Bu amérika hökümitining mu'awin prézidént mayk penstin kéyin yene bir qétim Uyghur rayonidiki yighiwélish lagérlirigha qamalghan tutqunlar sanining milyonlarche ikenlikini tekitlishidur.

B d t irqiy ayrimichiliqqa qarshi turush komitétining yéqinda ötküzülgen yighinida bir milyondek Uyghurning "Ashqunluqqa qarshi turush merkezliri"de we 2 milyondek kishining "Qayta terbiyelesh merkezliri" de siyasiy, medeniyet jehetlerde idiye özgertishke mejburliniwatqanliqi otturigha qoyulghan idi. Lékin xitay wekiller ömiki yighiwélish lagérlirining mewjutluqini inkar qilghan. Xitay tashqi ishlar ministirliqi buni "Xitaygha qarshi küchlerning yaman gherezlik böhtani" dégen idi.

ABC Qanilining xewiride bayan qilishiche, amérika tashqi ishlar ministirliqining emeldari yene "Az sanliq milletlerning öz medeniyiti we diniy kimlikini ipadilishige qarita perqlendürmey turup chékidin ashqan tedbirlerni qollinish ashqunliq we zorawanliqqa yol achidu," dégen. Xewerde kishilik hoquq teshkilatlirining tramp hökümitini qattiq bayanat élan qilishtin bashqa emeliy tedbirlerni élishqa chaqiriwatqanliqi, bu emeliy tedbirlerning birining "Yer shari magnétiskiy qanuni" ni ishqa sélish ikenlikini bildürgen.

Toluq bet