Xongkongdiki bezi ammiwi teshkilatlar namayish qilip, yighiwélish lagérlirini taqashni telep qildi

Muxbirimiz erkin
2018-09-03
Élxet
Pikir
Share
Print

Xongkongdiki bir qisim ammiwi teshkilatlar we siyasiy partiye-guruhlar 2‏-séntebir küni xitay merkizi hökümitining xongkongdiki alaqilishish ishxanisi aldida namayish qilip, Uyghur rayonidiki basturushqa naraziliq bildürgen.

Namayishchilar Uyghurlarni basturushni derhal toxtitishni, lagérlarni taqashni, Uyghur rayon'gha tekshürüsh ömiki ewetishni, munasiwetlik emeldarlarning jinayi jawabkarliqni sürüshtürüshni telep qilghan.

Firansiye xelq'ara radiyosining xewer qilishiche, namayishchilarning bayanatida "Yéqinqi bir yil mabeynide xitayning Uyghurlarni qattiq basturushi tedrijiy ashkarilinishqa bashlidi. Milyonlighan Uyghurlar 'qayta terbiyelesh lagérliri' gha solandi. Ottura hésab bilen her 10 Uyghurdin biri qamaqqa élindi. Da'iriler yene chong sanliq melumat, yuqiri téxnikiliq wasitilerni ishqa sélip, Uyghurlarni nazaret astigha aldi we ularning DNA ewrishkilirini toplidi. Hökümet xadimlirini Uyghur a'ililirige mejburiy orunlashturdi. Uyghurlarning heriket erkinliki qattiq cheklinip, memliketning her qaysi jayliridiki Uyghurlar qaytip kélishke buyruldi. Ularning chet'elge chiqishigha ruxset qilinmidi. Chet'eldiki Uyghurlarning xitay chégrasi ichidiki a'ile-tawabi'atlirigha tehdit sélip, ularni qaytip kélishke mejburlidi. Qaytip kelgenler iz déreksiz yoqap ketti. Uyghurlarning yaghliq artishi, saqal qoyushi, namaz oqushi jinayi ipade dep qaraldi. Mekteplerde Uyghur tilida ders ötüsh toxtitildi," déyilgen.

Namayishni uyushturghuchilarning biri, xongkong parlaméntining sabiq ezasi lyang goshyong bolup, u "Amérika awazi" radiyosigha qilghan sözide xitayni tenqidlep, "Shinjangda hazir Uyghurlargha yürgüzülüwatqan ziyankeshlikni b d t bir wekiller ömiki ewetip tekshürsila melum bolidu. Bu bir xelq'ara qa'ide. Sen shinjangdiki ehwallarni bashqilarning ighwasi, dep kelding. Undaq bolsa, ularning shinjangni erkin ziyaret qilip, Uyghurlar bilen uchrishishigha yol qoysanglar boldighu," dégen.

Bu qétimqi namayishni démokratlar partiyesi, ishchilar partiyesi, xongkong xristi'an muritliri ilmiy jem'iyiti, ijtima'iy démokratiye birleshmisi qatarliq 16 siyasiy partiye-guruh we ammiwi teshkilat élip barghan.

Toluq bet