Jenubiy afriqidiki bir gézit Uyghur élidiki lagérlar heqqide xewer yazghan zhurnalistni ishtin boshatqan

Muxbirimiz irade
2018-09-06
Élxet
Pikir
Share
Print

Xitay hökümitining Uyghur élidiki "Yépiq terbiye" lagérliri heqqidiki xewerlerning xelq'aragha tarqilishini qattiq kontrol qilishqa urunuwatqanliqi ashkarilanmaqta.

6-Séntebir küni jenubiy afriqining "Musteqil axbarat" namliq géziti özining mexsus iston yazghuchisi, zhurnalist azad éssaning sehipisini emeldin qalduruwetken bolup, buninggha uning Uyghur élidiki lagérlar heqqide yazghan xewiri seweb bolghan iken.

6-Séntebir küni azad éssaning özining tiwittér hésabi arqiliq ashkarilishiche, u ikki yildin béri jenubiy afriqining "Musteqil axbarat" gézitide xelq'araliq mesililer heqqide heptilik iston maqaliliri yézip kelgen.

Bu hepte u xitay hökümitining Uyghur élida bir milyondin oshuq Uyghur musulmanni lagérgha qamighanliqi heqqide mexsus xewer yézip, gézit tehrir hey'itige tapshurghan.Uning bayan qilishiche, "Xitay xelq'araliq téléwiziye shirkiti guruhi" we "Xitay-afriqa tereqqiyat fondi" din ibaret bu ikki organ jenubiy afriqining "Musteqil axbarat" gézitining bir qisim pay chékige ige bolghanliqtin u bu maqalisining élan qilinishigha ishench qilalmay qalghan bolsimu, charshenbe küni maqale dölet miqyasida tarqitilidighan gézitte neshr qilin'ghan.Biraq u arqidinla gézit tehriratidin uning maqalisining gézitning tor bet nusxisida élan qilinmaydighanliqi heqqide élxet tapshuruwalghan. U buning sewebini sorighanda gézittin uninggha bir jawab kelmigen.

Kütülmigende u bügün özining gézittiki mexsus sehipisining bikar qilin'ghanliqi heqqide xet tapshuruwalghan. Gézit da'iriliri xétide "Gézitimizdiki sehipilerde élip bérilghan özgirish we yéngi sistéma tüpeylidin mexsus iston yazghuchiliri maqalilirining élan qilinishidimu özgirish élip bérildi," dep yézilghan.  

Iston yazghuchisi tiwittérdiki sözide "Bu jenubiy afriqining kélechikidin dérek béremdu? bu jenubiy afriqining xitay bilen bolghan hemkarliqining qandaq bolidighanliqining bir bésharitimu?" dep yazghan. U tiwittér arqiliq ashkarilighan bu weqe "Nyu-york waqti géziti" ning muxbiri mélissa chén qatarliqlar teripidinmu tarqitilip küchlük inkas qozghidi.  

Firansiyelik zhurnalist ursula, amérikiliq zhurnalist méga rajagopalan qatarliqlarmu Uyghur élidiki weziyet heqqide xewer yazghanliqi üchün xitay hökümitining öch élishigha uchrighan zhurnalistlar idi.

Toluq bet