Wilyam browdér: "Jaza lagérlirida jawabkarliqi bar xitay emeldarlirini jazalash kérek"

Muxbirimiz erkin
2019-09-30
Élxet
Pikir
Share
Print

2019‏-Yilliq "Lantos kishilik hoquq mukapati" ning la'uriyanti wilyam browdér 27‏-séntebir küni amérika dölet mejliside ötküzülgen mukapat tarqitish murasimida söz qilip, amérikaning "Magnétiski kishilik hoquq qanuni" ni ishqa sélip, Uyghur rayonidiki kishilik hoquqni depsende qiliwatqan xitay emeldarlirini jazalishi kéreklikini bildürgen.

Wilyam browdér rusiyelik adwokat sérgéy magnétiskiyning namidiki "Magnitiski kishilik hoquq qanuni" ning 2012‏-yili dölet mejliside otturigha qoyulushi we uning maqullinishida türtkilik rol oynighan kishilik hoquq pa'aliyetchisi. "Yer shari magnitiski kishilik hoquq qanuni" amérika hökümitining her qaysi ellerdiki kishilik hoquq depsendichilikini jazalishidiki ötkür qorali, dep qarilip kelmekte.

Wilyam browdér mukapat tarqitish murasimida muxbirimizning alahide ziyaritini qobul qilip, Uyghur rayonidiki yighiwélish lagérlirining natsistlarning yehudiy jaza lagérliri bilen héchqandaq perqi yoqlighini bildürgen. U "Nöwette xitay hökümitining Uyghur xelqige qiliwatqanlirining natsistlar hakimiyitining yawropadiki yehudiylargha qilghanliri bilen héchqandaq perqi yoq. Jaza lagérliri, qayta-terbiyelesh lagérliri, qanunsiz öltürüsh, ten jazasi, dégenler buning jümlisidur. Buningda jawabkarliqi bar kishilerge tashqiridin émbargo qoymighiche, xitayning öz ichidin özgirishi bek müshkül," dégen.

Murasimda yene "Lantos kishilik hoquq fondi" ning re'isi katréna lantos swét xanim, tramp hökümitining "Magnétiski kishilik hoquq qanuni" ni ishqa sélip, "Sherqiy türkistanda insaniyetke qarshi turush jinayiti" sadir qiliwatqan xitay emeldarlirini jazalashning pewqul'adde muhimliqini tekitligen. Mezkur rayonda dunyadiki eng qorqunchluq bigunah puqralarni xorlash qilmishi yüz bériwatqanliqini tekitligen katrina lantos xanim "Biz xitay hökümitini jawabkarliqqa tartishimiz kérek" dégen.

"Lantos kishilik hoquq fondi" ning bildürüshiche, wilyam browdérning naheqchilikke qarshi adaletni yaqlashtek tewrenmes rohi, "Magnétiski kishilik hoquq qanuni" ning maqullinishida oynighan roli seweblik 2019‏-yilliq "Lantos kishilik hoquq mukapati" uninggha layiq körülgen. 27‏-Séntebirdiki mukapat tarqitish murasimigha awam palata ezasi kristofir simit, jéymis mikgowérn we sabiq awam palata ezasi frank wolf, rabiye qadir qatarliq kishiler qatnashqan.

Toluq bet