Xitayning amérikidiki bash elchisi Uyghur diyaridiki lagérlarning mewjutluqini qismen inkar qildi

Muxbirimiz erkin
2018-10-04
Élxet
Pikir
Share
Print

Xitayning amérikidiki bash elchisi süy tyenkey 3‏-öktebir küni amérika döletlik ammiwi radiyosi yeni npr ning ziyaritini qobul qilip, Uyghur diyaridiki lagérlarning mewjutluqini qismen inkar qilghan.

Süy tyenkey yuqiriqi sözni npr ning riyasetchisi stif insképning lagérlar toghrisidiki so'aligha jawab bergende qilghan. U riyasetchining "Siz béyjingdiki amérika elchisining tibetni ziyaret qilishini xalaysiz, gherbiy-shimaldiki Uyghur rayonini ziyaret qilishinichu" dégen so'aligha éniq jawab bermigen.

U mezkur rayonda térrorluq mesilisining barliqi, térrorluqning "Rayondiki xelqlerning bixeterliki üchün asasliq tehdit" ikenlikini ilgiri sürgen.

U yene riyasetchining "Bu yerde térrorluqni puqralargha qarshi turushta omumyüzlük bahane qiliwatqandek weziyet mewjut. B d t ning bu rayonda yüz minglighan Uyghurning lagérlargha qamalghanliqi heqqidiki bayanigha néme deysiz" dégen so'aligha müjmel jawab bérip, "Bezide keng tarqalghan melumatlar toghra bolmasliqi, ré'alliqtin yiraq bolushi mumkin" dégen.

Uning ilgiri sürüshiche, xitay hökümiti "Bu rayonida néme qilghan bolsa xelqning tinchliqi, salametliki we bixeterliki üchün, ularning chong menpe'etini qoghdash üchün" qilghan iken. Süy tyenkey riyasetchining "Xelqni lagérlargha buning üchün qamawatamsiler" dégen so'aligha "Yaq, biraq biz da'ishtek guruppilarning bu rayon'gha tarqilishining aldini élish tedbirlirini qollinishimiz kérek" dep jawab bergen. Riyasetchi uning bu sözi kishilerde "Lagérlar bar" dégen chüshenche peyda qilidighanliqini tekitligen. Lékin süy tyenkey özining lagérlar bar démigenlikini ilgiri sürgen.

U yene riyasetchining "Siz lagérlar yoq démekchimu" dégen so'aligha ikki bisliq jawab bérip, özining "Lagérlar mewjut" démigenliki, lékin kishilerning kespiy terbiye éliwatqanliqi, iqtisadi qabiliyitini yuqiri kötürüshning téxnikilirini öginiwatqanliqini tekitligen. Xitay emeldarliri burun yighiwélish lagérliri yaki atalmish "Qayta terbiyelesh lagérliri" ning mewjutluqini ret qilip kelgen bolsimu, lékin yéqindin buyan qismen inkar qilish yaki wasitilik étirap qilish usulini qollinip, özining rayondiki qattiq qol siyasitini aqlashqa urunup kelmekte.

Toluq bet