D u q xelq'ara jem'iyetni lagérlarda ghayib bolghan Uyghurlarning iz-dérikini qilishqa chaqirdi

Muxbirimiz erkin
2018-10-22
Élxet
Pikir
Share
Print

Dunya Uyghur qurultiyi 19‏-öktebir bayanat élan qilip, xitayning yighiwélish lagérlirini inkar qilishtin uni perdazlashqa ötkenliki, xelq'ara jem'iyet ghayib bolghan Uyghurlarning iz-dérikini qilishi kéreklikini bildürdi.

Dunya Uyghur qurultiyining bayanati xitay merkizi téléwiziye istansisining yéqinda élan qilghan lagérlar heqqidiki programmisi we Uyghur aptonom rayonining re'isi shöhret zakirning shinxu'a agéntliqigha qilghan lagérlar heqqidiki sözlirige qarita élan qilin'ghan.

Bayanatta, ötken hepte xitay hökümitining lagérlargha da'ir pozitsiyesi derhal özgirip, lagérlarni perdazlap körsitishke bashlighanliqi, lékin uning perdazlishi ammiwi guruhlar, tetqiqatchilar we diplomatlarning rayondiki éghir kishilik hoquq depsendichilikige da'ir doklatlirigha pütünley zit ikenlikini bildürgen.

Xitay hökümiti yéqinqi kün'giche lagér yaki "Terbiyelesh merkezliri" ning mewjutluqini inkar qilip kelgen. Peqet u ötken Uyghur aptonom rayonining re'isi shöhret zakir shinxu'a agéntliqigha söhbet élan qilip, uning mewjutluqini étirap qilghan. Emma bu orunlarning "Kespiy terbiyelesh mektepliri" ikenlikini ilgiri sürgen. Arqidinla xitay merkizi téléwiziye istansisi atalmish bu "Kespiy terbiyelesh mektepliri" ni tonushturup bir programma ishligen idi.

Bayanatta d u q re'isi dolqun eysa söz qilip, "Xitay 2018‏-yilning otturilirighiche lagérlarning mewjutluqini inkar qilip kelgen bolsimu, mana emdi bu orunlarni kespiy terbiyelesh merkezliri, dep perdazlap, kishilik hoquqni éghir depsende qiliwatqanliqini ret qilmaqta" dégen.

Bayanatta qeyt qilinishiche, xelq'ara jem'iyet xitay emeldarlirining b d t kishilik hoquq kéngishi kéler ay jenwede xitay kishilik hoquq xatirisini qerellik körüp chiqish harpisida élan qilghan bayanatlirigha diqqet qilishi kérek iken.

Bayanatta, alaqidar döletler derhal tekshürüsh élip bérishqa chaqirilip, "Méning a'ilem qéni, dégen so'algha jawab élish üchün dawamliq bésim ishlitish biz ammiwi teshkilatlarning wezipisi" déyilgen.

Toluq bet