“муһапизәтчи” гезити уйғур дияридики лагерлар мәсилиси бойичә тәһрират мақалиси елан қилди

Әнглийәдә нәшр қилинидиған нопузлуқ гезитләрдин “муһапизәтчи” гезити бүгүн мәхсус тәһрират мақалиси елан қилип, хитай һөкүмитиниң уйғур елидә қурған йиғивелиш лагерлирини тәнқид қилди шундақла хәлқара җәмийәтни буниңға қарита һәрикәткә өтүшкә чақирди.

Мақалидә баян қилинишичә, хитай һөкүмити уйғур елидә қанунсиз һалда қурған вә милйонлиған бигунаһ кишиләрни қамивалған бу лагерларни дәсләптә инкар қилған. Әмма хитай бу йил ноябирда җәнвәдә ечилиш алдида турған кишилик һоқуқ йиғини алдида туюқсизла муқамини өзгәртип, бу лагерларниң мәвҗутлуқини, бирақ бу орунларниң “диний әсәбийликниң тәсиригә учриған кишиләрни тәрбийәләп өзгәртидиған” орунлар икәнликини тәшвиқ қилишқа башлиған.

“муһапизәтчи” гезитиниң тәкитлишичә, хитай бу тәшвиқатлири арқилиқ милйонлиған кишиләрни мәҗбурий һалда соливалған бу лагерларни хәлқараға йоллуқ қилип көрситиш мәқситигә һәргизму йетәлмәйдикән. Чүнки инсанларни һечқандақ қанун тәртиписиз, сотсиз һалда тутуп туруш пүтүнләй қанунсиз болуш билән биргә уйғур елидики лагерлар һәққидә хәлқара таратқулар, җүмлидин б б с, фирансийә агентлиқи қатарлиқ ахбарат органлири тәрипидин ашкарилиниватқан қорқунчлуқ деталларму хитайниң юқириқи сахта тәшвиқатлириниң маһийитини ечип көрсәтмәктикән.

“муһапизәтчи” гезитиниң бүгүн елан қилған тәһрират мақалисидә йәнә уйғур елидә ата-анилиридин мәҗбурий айрилип, шәкли өзгәргән йетимханиларға апириветилгән балилар мәсилиси вә шундақла өз өйлиридә аталмиш хитай “қошмақ туғқанлири” тәрипидин назарәткә елиниватқан уйғур аилилириму тилға елинған. Мақалидә “мана бу хилдики кишини биарам қилидиған пакитлар та йеқинғичә сүкүттин башқини көрмиди. Мусулман дөләтлириму буниңға сүкүт қилди. Бирақ йеқиндин бу вәзийәттә өзгириш болуватиду. Америка һөкүмити җаза тәдбири елан қилиши мумкинликини ипадилиди. Б д т ниң йеңидин сайланған кишилик һоқуқ комиссари мичәл бәчелит ханим бу мәсилини тилға алди. Йәнә башқиларму өз әндишилирини баян қиливатиду. Демәк, һазир немиләрниң йүз бериватқини бизгә айдиң болди. Әмдики мәсилә ким һәрикәткә өтиду дегән мәсилидур,” дейилгән.