"Muhapizetchi" géziti Uyghur diyaridiki lagérlar mesilisi boyiche tehrirat maqalisi élan qildi

Muxbirimiz irade
2018-11-01
Élxet
Pikir
Share
Print

En'gliyede neshr qilinidighan nopuzluq gézitlerdin "Muhapizetchi" géziti bügün mexsus tehrirat maqalisi élan qilip, xitay hökümitining Uyghur élide qurghan yighiwélish lagérlirini tenqid qildi shundaqla xelq'ara jem'iyetni buninggha qarita heriketke ötüshke chaqirdi.

Maqalide bayan qilinishiche, xitay hökümiti Uyghur élide qanunsiz halda qurghan we milyonlighan bigunah kishilerni qamiwalghan bu lagérlarni deslepte inkar qilghan. Emma xitay bu yil noyabirda jenwede échilish aldida turghan kishilik hoquq yighini aldida tuyuqsizla muqamini özgertip, bu lagérlarning mewjutluqini, biraq bu orunlarning "Diniy esebiylikning tesirige uchrighan kishilerni terbiyelep özgertidighan" orunlar ikenlikini teshwiq qilishqa bashlighan.

"Muhapizetchi" gézitining tekitlishiche, xitay bu teshwiqatliri arqiliq milyonlighan kishilerni mejburiy halda soliwalghan bu lagérlarni xelq'aragha yolluq qilip körsitish meqsitige hergizmu yételmeydiken. Chünki insanlarni héchqandaq qanun tertipisiz, sotsiz halda tutup turush pütünley qanunsiz bolush bilen birge Uyghur élidiki lagérlar heqqide xelq'ara taratqular, jümlidin b b s, firansiye agéntliqi qatarliq axbarat organliri teripidin ashkariliniwatqan qorqunchluq détallarmu xitayning yuqiriqi saxta teshwiqatlirining mahiyitini échip körsetmektiken.

"Muhapizetchi" gézitining bügün élan qilghan tehrirat maqaliside yene Uyghur élide ata-aniliridin mejburiy ayrilip, shekli özgergen yétimxanilargha apiriwétilgen balilar mesilisi we shundaqla öz öyliride atalmish xitay "Qoshmaq tughqanliri" teripidin nazaretke éliniwatqan Uyghur a'ililirimu tilgha élin'ghan. Maqalide "Mana bu xildiki kishini bi'aram qilidighan pakitlar ta yéqin'ghiche süküttin bashqini körmidi. Musulman döletlirimu buninggha süküt qildi. Biraq yéqindin bu weziyette özgirish boluwatidu. Amérika hökümiti jaza tedbiri élan qilishi mumkinlikini ipadilidi. B d t ning yéngidin saylan'ghan kishilik hoquq komissari michel bechélit xanim bu mesilini tilgha aldi. Yene bashqilarmu öz endishilirini bayan qiliwatidu. Démek, hazir némilerning yüz bériwatqini bizge ayding boldi. Emdiki mesile kim heriketke ötidu dégen mesilidur," déyilgen.

Toluq bet