Хитай, германийә кишилик һоқуқ комиссариниң уйғур елидики лагерларни көздин кәчүрүш тәлипини рәт қилған

Мухбиримиз ирадә
2018-12-05
Елхәт
Пикир
Share
Принт

Германийә кишилик һоқуқ комиссари барбел кофлерниң уйғур елидики йепиқ тәрбийә лагерлирини зиярәт қилиш тәлипи рәт қилинған.

Бирләшмә агентлиқниң бу һәқтики хәвиридин қариғанда, германийә кишилик һоқуқ комиссари барбел кофлер уйғур елидики лагерларни көздин кәчүрмәкчи болуп, хитай тәрәпкә илтимас сунған. Бирақ, хитай униң тәлипини рәт қилған.

Барбел кофлер бу һәқтә елан қилған баянатида «мән уйғурларға қилиниватқан муамилә һәққидики хәвәрләрни көрүп чөчүп кәттим. Мән у йәрдики әһвалларни биваситә һалда көрүшни арзу қилған идим. Бирақ, мән шинҗаңни зиярәт қилиш тәлипимни йәнә давамлаштуримән» дегән.

Мәлум болушичә, кофлер ханим германийә-хитай кишилик һоқуқ сөһбити үчүн хитайға баридикән. У, 6- вә 7-декабир күнлири тибәтниң мәркизи лхасада хитайдики чекидин ашқан контрол, дини етиқад әркинликини чәкләш вә бир кишиниң җинайити үчүн пүтүн аилә әзалирини тәң җазалаш қатарлиқ мәсилиләр бойичә хитай тәрәп билән сөһбәт өткүзүлидикән.

Кофлер ханим мухбирларға қилған сөзидә хитайдики барғанчә начарлишип меңиватқан кишилик һоқуқ вәзийитидин қаттиқ әндишә һес қиливатқанлиқини ипадә қилип, «буни түзитишниң бирдин-бир йоли хитай һөкүмитигә тәләплиримизни ениқ оттуриға қоюштур» дегән.

Хитай һөкүмити уйғур елидики лагерларниң «кәспий техника билән тәрбийәләш» орни икәнликини, «оқуғучилар» ниң бу «арамбәхш» орунларда хушаллиқ билән дәрс еливатқанлиқини күчәп тәшвиқ қилсиму әмма хәлқара ахбарат органлириниң мухбирлири вә мустәқил көзәткүчиләрниң районға берип әмәлийәтни көрүшигә қаттиқ чәкләп кәлмәктә.

Пикирләр (0)
Share
Толуқ бәт