Xitay, gérmaniye kishilik hoquq komissarining Uyghur élidiki lagérlarni közdin kechürüsh telipini ret qilghan

Muxbirimiz irade
2018-12-05
Élxet
Pikir
Share
Print

Gérmaniye kishilik hoquq komissari barbél koflérning Uyghur élidiki yépiq terbiye lagérlirini ziyaret qilish telipi ret qilin'ghan.

Birleshme agéntliqning bu heqtiki xewiridin qarighanda, gérmaniye kishilik hoquq komissari barbél koflér Uyghur élidiki lagérlarni közdin kechürmekchi bolup, xitay terepke iltimas sun'ghan. Biraq, xitay uning telipini ret qilghan.

Barbél koflér bu heqte élan qilghan bayanatida "Men Uyghurlargha qiliniwatqan mu'amile heqqidiki xewerlerni körüp chöchüp kettim. Men u yerdiki ehwallarni biwasite halda körüshni arzu qilghan idim. Biraq, men shinjangni ziyaret qilish telipimni yene dawamlashturimen" dégen.

Melum bolushiche, koflér xanim gérmaniye-xitay kishilik hoquq söhbiti üchün xitaygha baridiken. U, 6- we 7-dékabir künliri tibetning merkizi lxasada xitaydiki chékidin ashqan kontrol, dini étiqad erkinlikini cheklesh we bir kishining jinayiti üchün pütün a'ile ezalirini teng jazalash qatarliq mesililer boyiche xitay terep bilen söhbet ötküzülidiken.

Koflér xanim muxbirlargha qilghan sözide xitaydiki barghanche nacharliship méngiwatqan kishilik hoquq weziyitidin qattiq endishe hés qiliwatqanliqini ipade qilip, "Buni tüzitishning birdin-bir yoli xitay hökümitige teleplirimizni éniq otturigha qoyushtur" dégen.

Xitay hökümiti Uyghur élidiki lagérlarning "Kespiy téxnika bilen terbiyelesh" orni ikenlikini, "Oqughuchilar" ning bu "Arambexsh" orunlarda xushalliq bilen ders éliwatqanliqini küchep teshwiq qilsimu emma xelq'ara axbarat organlirining muxbirliri we musteqil közetküchilerning rayon'gha bérip emeliyetni körüshige qattiq cheklep kelmekte.

Toluq bet