Dunya islam hemkarliq teshkilati Uyghur élidiki lagér tüzümidin endishe qiliwatqanliqini bildürdi

Muxbirimiz irade
2018-12-11
Élxet
Pikir
Share
Print

Dunya islam hemkarliq teshkilati qarmiqidiki da'imliq kishilik hoquq komitéti bayanat élan qilip, xitay hökümitini Uyghur musulmanlirining hoquqlirigha hörmet qilishqa chaqirdi.

57 Islam döliti eza bolghan mezkur organ tiwittérdiki resmiy hésabi arqiliq élan qilghan bayanatida xitay hökümitining Uyghur musulmanlirigha qaritiwatqan kemsitish siyasitining qattiq kücheygenliki, Uyghur musulmanlirining "Qayta terbiye merkizi" namidiki lagérlargha qamilip, dini étiqadigha qarshi bolghan qimmet qarash we heriketlerge mejburliniwatqanliqidin melumat alghanliqini bayan qilghan.

Bayanatta yene munular déyilgen: "Xitay hökümiti Uyghur aptonom rayonida yolgha qoyghan 'esebiylikke qarshi turush qanuni' ning mezmuni chékidin ashqan bolup, u emeliyette 'yépiq terbiye' lagérlirining mewjutluqini aqlash rolini oynimaqta. Biz xitayning asasiy qanunlirida puqralargha din'gha ishinish erkinliki bérilgenlikini, jümlidin hökümetning barliq puqralarning bu hoquqlardin behrimen bolushini kapaletke ige qilish mejburiyitining barliqini semige salmaqchimiz."

Dunya islam hemkarliq teshkilati qarmiqidiki da'imliq kishilik hoquq komitéti bayanatida yene xitay hökümitining Uyghur musulmanlirigha qiliwatqan mu'amilisi heqqidiki kishini chöchütidighan doklatlardin qayghurghanliqini ipade qilish bilen birge yene nurghun islam döletliri bilen qoyuq munasiwiti bolghan xitay hökümitini xelq'aradiki musulman jama'itining endishilirini nezerge alghan asasta mesilini hel qilishqa chaqirghan.

Xitay hökümitining Uyghur élide 2 milyondin oshuq Uyghur we bashqa xelqlerni lagérgha qamap, ulargha qarita medeniyet qirghinchiliqi yürgüzüwatqanliqi amérika hökümiti, yawropa ittipaqi we birleshken döletler teshkilati qatarliq dölet we organlar teripidin tilgha élin'ghan bolsimu, emma hazirghiche birmu musulman dölitining ipade bildürmesliki küchlük naraziliq peyda qilghan idi. Radiyomiz ilgiri bir qanche qétim bu teshkilat bilen alaqe qilishqa tirishqan bolsimu, ulardin bir jawab alalmighan idi.

Chet'ellerdiki Uyghur közetküchilerning qarishiche, yuqiriqi bu teshkilatning inkasi yéterlik bolmisimu, emma uni yéngi bir yüzlinish, dep qarashqa bolidiken.

Toluq bet