Amérikidiki uniwérsitétlar Uyghur rayonidiki lagérlarda ishlepchiqirilghan tenterbiye kiyimlirini yighmaqta iken

Muxbirimiz erkin
2018-12-21
Élxet
Pikir
Share
Print

Amérikidiki bajér shirkitining Uyghur rayonidiki yighiwélish lagérlirida ishlepchiqirilghan tenterbiye kiyimlirini import qilip amérikida bazargha salghanliqi ashkarilan'ghandin kéyin, amérikidiki her qaysiy uniwérsitétlar bajér shirkitining mektep dukanliridiki tenterbiye kiyimlirini yighiwétishke bashlighan.

Amérikidiki CBS téléwiziye qanilining xewer qilishiche, meyin shtatidiki bowdu'in, beytés, kolbéy, meyin uniwérsitéti, indi'ana uniwérsitéti, téksas A&M uniwérsitéti we shimaliy karulinadiki apalichén uniwérsitéti qatarliq aliy mektepler buyruq chüshürüp, mektep dukanliridiki bajér shirkitining tenterbiye kiyimlirini yighiwetken.

Apalachin uniwérsitétining bayanatchisi CBS téléwiziye qaniligha bergen bayanatida, mezkur uniwérsitétning bajér shirkiti bilen bolghan toxtamini bikarqilghanliqi, buningdin kéyin bajér shirkitining tenterbiye kiyimlirini satmaydighanliqini bildürgen. Téksas A&M uniwérsitétining tereqqiyat ishlirigha mes'ul mu'awin mudiri shanéy hénkléy "Téksas A&M uniwérsitéti herqandaq ehwalda mejburiy emgekni ishqa sélishqa köz yummaydu we qollimaydu," dégen.

Yéqinda amérikidiki bajér tenterbiye kiyimliri shirkitining xitayning "Teyda hessidarliq cheklik shirkiti" xotendiki yighiwélish lagérlirida tutqunlarni mejburiy emgekke sélish arqiliq ishlepchiqarghan tenterbiye kiyimlirini import qilip, amérikida bazargha salghanliqi ashkarilan'ghan idi. Bu xewerni birleshme agéntliq, "Nyu-york waqti géziti", "Maliye waqti géziti" qatarliq dunyadiki nopuzluq agéntliqlar we gézitler ashkarilap, zor ghulghula qozghighan idi.

Bu xewer ashkarilan'ghandin kéyin, bajér shirkiti xotendin kiyim-kéchek import qilghanliqini étirap qilghan. Bu shirketning ijra'iye diréktori jon anton tiwéttrda bayanat élan qilip, import qilin'ghan mehsulatlarni sétishni, buningdin kéyin "Teyda shirkiti" din mehsulat sétiwélishni toxtatqanliqini élan qilghan idi. "Nyu-york waqti" we "Maliye waqti" gézitlirining xewiride ashkarilishiche, nöwette xitay da'iriliri Uyghur rayonidiki lagérlarda yaki lagérlarning yénida zawut-karxanilarni qurup, tutqunlarni mejburiy emgekke salmaqta iken.

Toluq bet