Хитай лагерлар һәққидики тәтүр тәшвиқатини давамлаштурмақта

Мухбиримиз сада
2018-10-23
Елхәт
Пикир
Share
Принт

Хитайниң уйғурларға йүргүзүватқан зор көләмлик зәрбә бериш һәрикити йәниму кеңийиватқанда җаза лагерлирини«маарип билән толған, интайин көңүллүк бир җай», дәп тәшвиқ қилиши һелиһәм давамлашмақта.

«Йәршари вақти» гезитиниң 21-өктәбир күнигә бесилған «шинҗаңниң маарип программиси тәрбийәләнгүчиләр вә аилиләрниң турмуш сүпитини юқири көтүрди» сәрләвһилик мақалиси хитайниң изчил давамлишиватқан тәтүр тәшвиқатиниң типик бир мисали дәп қаралди. Мақалигә хотәндики мәлум «техника тәрбийәләш мәктипи» ниң ичи вә у йәрдики аталмиш «тәрбийәләнгүчиләр» ниң «маарип вә техника»тәрбийәси алғандин кейин, «хушаллиқи ичигә патмиған» сүрити бесилған. Униңдин башқа йәнә аталмиш «тәрбийәләшкә қатнишиватқан» ларниң пәрзәнтлириниң дәрсханида олтурған һалити вә мухбир зиярәткә барғанда һәммәйләнниң орнидин туруп пионерлар салими бәргәнлики көрситилгән сүрәтму қошуп қоюлған.

Кишиниң диққитини қозғайдиған бир нуқта шуки, дәрсханида олтурған балиларниң мәктәп формисиниң оң тәрипигә қара юмилақ чәмбирәк бесилған. Әмма бу чәмбирәкниң немә үчүн бесилғанлиқи һәққидә һечқандақ бир изаһат берилмигән.

Шу қатарда йәнә 22-өктәбир күни «квартс» торида «васкетбол вә хушал балилар: шинҗаңдики тутуп туруш лагерлириниң сүрәтлири» намлиқ бир мақалә елан қилинған. Мәзкур мақалидә хитай һөкүмитиниң җаза лагерлирини йолға қоюшни«ашқун идийәләрниң ямрап кетишидин сақлиниш», дәп өзини ақлаш тәшвиқати қиливатқанлиқи нуқтилиқ гәвдиләндүрүлгән.

Мақалидә йәнә хитайниң тәтүр тәшвиқатини давамлаштурушта пүтүн күчи билән һәмдәмдә болуватқан «йәршари вақти» гезитиниң баш тәһририму тилға елинған. Мәлум болушичә, у бир қанчә хизмәтдашлири билән хотәндики тәрбийәләш мәктәплирини зиярәт қилған болуп, униң баян қилишичә, «ғәрб ахбаратиниң лагер һәққидики чүшәнчиси у өз көзи билән көргән муһит билән зит икән». Униң дейишичә, хитай дәватқан лагерлар пәқәтла тәрбийәләшни асас қилған бир «көңүллүк» җай икән.

Вәһаләнки, хәлқара мәтбуатларда хитайниң җаза лагерлирини түрлүк усуллар билән пәрдазлап көрситиш арқилиқ өз қилмишлирини хәлқара җәмийәт алдида ақлашқа урунуватқанлиқи илгири сүрүлмәктә. Хитай даирилириниң бу тәшвиқатлири бәрибир ишәнчкә еришәлмәстин әксичә тәнқидкә учримақта.

Пикирләр (0)
Share
Толуқ бәт