Xitay lagérlar heqqidiki tetür teshwiqatini dawamlashturmaqta

Muxbirimiz sada
2018-10-23
Share

Xitayning Uyghurlargha yürgüzüwatqan zor kölemlik zerbe bérish herikiti yenimu kéngiyiwatqanda jaza lagérlirini"Ma'arip bilen tolghan, intayin köngüllük bir jay", dep teshwiq qilishi hélihem dawamlashmaqta.

"Yershari waqti" gézitining 21-öktebir künige bésilghan "Shinjangning ma'arip programmisi terbiyelen'güchiler we a'ililerning turmush süpitini yuqiri kötürdi" serlewhilik maqalisi xitayning izchil dawamlishiwatqan tetür teshwiqatining tipik bir misali dep qaraldi. Maqalige xotendiki melum "Téxnika terbiyelesh mektipi" ning ichi we u yerdiki atalmish "Terbiyelen'güchiler" ning "Ma'arip we téxnika"terbiyesi alghandin kéyin, "Xushalliqi ichige patmighan" süriti bésilghan. Uningdin bashqa yene atalmish "Terbiyeleshke qatnishiwatqan" larning perzentlirining dersxanida olturghan haliti we muxbir ziyaretke barghanda hemmeylenning ornidin turup pi'onérlar salimi bergenliki körsitilgen süretmu qoshup qoyulghan.

Kishining diqqitini qozghaydighan bir nuqta shuki, dersxanida olturghan balilarning mektep formisining ong teripige qara yumilaq chembirek bésilghan. Emma bu chembirekning néme üchün bésilghanliqi heqqide héchqandaq bir izahat bérilmigen.

Shu qatarda yene 22-öktebir küni "Kwarts" torida "Waskétbol we xushal balilar: shinjangdiki tutup turush lagérlirining süretliri" namliq bir maqale élan qilin'ghan. Mezkur maqalide xitay hökümitining jaza lagérlirini yolgha qoyushni"Ashqun idiyelerning yamrap kétishidin saqlinish", dep özini aqlash teshwiqati qiliwatqanliqi nuqtiliq gewdilendürülgen.

Maqalide yene xitayning tetür teshwiqatini dawamlashturushta pütün küchi bilen hemdemde boluwatqan "Yershari waqti" gézitining bash tehririmu tilgha élin'ghan. Melum bolushiche, u bir qanche xizmetdashliri bilen xotendiki terbiyelesh mekteplirini ziyaret qilghan bolup, uning bayan qilishiche, "Gherb axbaratining lagér heqqidiki chüshenchisi u öz közi bilen körgen muhit bilen zit iken". Uning déyishiche, xitay dewatqan lagérlar peqetla terbiyeleshni asas qilghan bir "Köngüllük" jay iken.

Wehalenki, xelq'ara metbu'atlarda xitayning jaza lagérlirini türlük usullar bilen perdazlap körsitish arqiliq öz qilmishlirini xelq'ara jem'iyet aldida aqlashqa urunuwatqanliqi ilgiri sürülmekte. Xitay da'irilirining bu teshwiqatliri beribir ishenchke érishelmestin eksiche tenqidke uchrimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.