Xitay hökümitining lagérlardiki ölüm weqesini wirusqa baghlash éhtimalliqi endishe qozghimaqta

Muxbirimiz eziz
2020-02-06
Share

Pütün dunyani sarasimige séliwatqan xitaydiki tajisiman wirus wehimisi hazirqi axbarat wastiliri köplep xewer qiliwatqan témilardin boluwatqanda xitay hökümitining Uyghur diyaridiki lagérlarda köplep körülüwatqan ölüm weqelirini mushu wirusqa baghlap yoshurup kétish éhtimalliqi nurghun Uyghurlarni endishige salmaqta.

Tajisiman wirusning ademdin ademge hemde hawadin tarqilishtek qorqunchluq alahidiliki xitayda besh yüzdin artuq kishining hayatini axirlashturdi. Halbuki, Uyghur diyaridiki "Üch milyondin artuq kishi qamalghan" dep texmin qiliniwatqan lagérlarda rohiy we jismaniy jehetlerdiki qiynaq sewebidin her küni oxshimighan sanda ölüm weqeliri körülüp kelmekte. En'gliyediki obzorchi émma brazél 6-féwral küni mexsus maqale élan qilip, muhajirettiki Uyghurlarning mushu xil endishisini bayan qildi. 

Wuxen shehridin tarqiliwatqan tajisiman wirus bilen yuqumlan'ghuchi nurghun xitayning Uyghur diyarigha qéchip kéliwalghanliqi hemde nöwette az dégendimu 36 kishining yuqumlinip bolghanliqi melum. Emdilikte xitay da'irilirining lagérlardiki ölüm weqelirini mushu yuqumluq késelge artip qoyush arqiliq özlirini mes'uliyettin élip qéchish éhtimalliqi köpligen so'allargha duch kelmekte. Amérikadiki Uyghur pa'aliyetchi behram sintash bu heqte söz qilip: "Nöwette uruq-tughqanliri lagérgha qamalghan hemmila Uyghur mushu haldin endishige chüshmekte," dégen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet