Трамп, латин америкиси дөләтлирини тиҗарәттә хитай әмәс, бәлки америка билән һәмкарлишишқа чақиридикән

Мухбиримиз ирадә
2018-04-05
Елхәт
Пикир
Share
Принт

Ройтерс агентлиқиниң хәвәр қилишичә, америка президенти трамп хитай билән сода җәһәттә қаттиқ тиркишиватқан бир пәйттә, латин америкисидики дөләтләрни тиҗарәттә хитай билән һәмкарлашмаслиққа чақиридикән.

Мәлум болушичә, президент трамп келәр һәптә перуниң пайтәхти лимада америка қитәсидики дөләтләр башлиқлири йиғиниға қатнишидиған болуп, исмини ашкарилашни халимайдиған бир һөкүмәт әмәлдари униң бу қетимлиқ йиғинда латин америкиси дөләтлирини тиҗарәттә хитай билән әмәс, бәлки америка билән һәмкарлишишқа чақиридиғанлиқини ейтқан.

Мәлум болушичә, америка президенти доналд трамп канада вә мексика қатарлиқ дөләтләр билән «шималий америка әркин тиҗарәт келишими» гә қайта қарап чиқиш, биразилийәдин импорт қилинидиған полатқа баҗ қоюш қатарлиқ башқа муһим мәсилилири болсиму, әмма униң бу йиғиндики әң муһим күнтәртипи хитай билән болған мунасивәткә мәркәзлишидикән. У, латин америкисидики дөләтләрни хитайниң америкидәк уларға яхши шерик болалмайдиғанлиқи һәққидә агаһландуридикән.

Ройтерс агентлиқиға мәлумат бәргән әмәлдарниң билдүрүшичә, «хитайниң латин америкисидики дөләтләргә қаратқан иқтисадий сиясәтлири йиллардин бери бу дөләтләргә һечқандақ бир әмәлий мәнпәәт берип бақмиған икән.»

Америка президенти трамп, алдинқи һәптә хитайниң санаәт, пән-техника вә дора мәһсулатлири қатарлиқ 1300 хил мәһсулатиға қарита җаза тәдбири елан қилған иди. Арқидинла хитай тәрәпму америкиниң сериқ пурчақ, аптомобил, кала гөши вә бәзи химийә мәһсулатлириға қарита чегра беҗини өстүридиғанлиқини елан қилди. Бир қисим көзәткүчиләр, хитай билән америка арисидики «сода уруши» ниң йәниму кәскинлишидиғанлиқини мөлчәрлимәктә.

Пикирләр (0)
Share
Толуқ бәт