Amérika prézidénti tramp "Lettés" shirkitining xitaygha sétilishini bikar qildi

Muxbirimiz irade
2017-09-14
Share

Amérika prézidénti tramp bügün amérikaning lettés yérim ötküzgüch téxnika shirkitining xitaygha sétilishini cheklidi.

B b s ning bu heqtiki xewirige qarighanda, mezkur shirket amérikidiki kompyutér merkizi özeklirini ishlepchiqiridighan muhim shirketlerning biri bolsimu, emma u ötken ikki yilda uda ziyan tartqan. Shirket sétishqa chiqirilghandin kéyin xitayning "Kanyon köwrüki" shirkiti uni sétiwélish üchün 1.3 Milyard dollar baha qoyghan iken.

Emma bu soda amérika hökümiti we dölet mejlisining küchlük diqqitini qozghighan. Tramp hökümiti bu sodining yuqiri téxnikilarning oghrilinish aqiwitini keltürüp chiqirishi mumkinlikini bildürgen. Melum bolushiche, mezkur shirket ishlepchiqarghan kompyutér özekliri amérika hökümet organliridimu keng ishlitilidiken.

Prézidént tramp peyshenbe küni lettés shirkitini xitay dölet igidarchiliqigha tewe dep qariliwatqan "Kanyon köwrüki" shirkitige sétishni chekleshni qarar qilghandin kéyin, xitay shirkiti bu qarardin epsuslan'ghanliqini bildürgen. Ular, "Soda emeliyleshken bolsa shirkettiki xizmetchilerning ish ornini saqlap qélishqa paydiliq bolghan bolatti," dep bayanat bergen. Biraq xitay shirkiti amérikaning özliri heqqidiki endishilirige bir jawab bermigen.

Lettés shirkiti prézidént trampning qararini qarshi alidighanliqini bildürgen hemde uni "Dölitimiz we shirkitimizning hessidarliri shundaqla xizmetchilirimizning menpe'eti üchün paydiliq qarar boldi," dégen.

Igilinishiche, amérika hökümiti yéqindin buyan xitay bilen bolghan soda munasiwetliridiki pozitsiyisini chingaytishqa bashlighan. Ötken ay amérika dölet mejlisi xitayning eqliy mülük hoquqigha chétilidighan mesililerni közdin kechürüp chiqip, nawada amérika shirketliri xitaygha sétilsa muhim uchurlarning xitayning qoligha chüshüp kétish xetiri barliqini eskertken. Nurghun amérikaliq siyasetchilermu xitayning amérikigha séliwatqan mebleghlirini alahide diqqet bilen közitishke chaqirghan idi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.