Xitay bash ministiri li chyang Uyghur diyarida xizmet tekshürüshide bolghan

Washin'gtondin muxbirimiz erkin teyyarlidi
2024.05.10

Xitay bash ministiri li chyang 5-ayning 7-künidin 9-künigiche tuyuqsiz Uyghur diyarigha kélip, ürümchi, sanji, “Shinjang ishlepchiqirish qurulush bingtüeni” ning wujyachü shehiri, alataw we qorghan éghizlirida tekshürüshte bolghan.

Xitay taratqulirining xewerliride, li chyangning Uyghur diyaridiki ikki künlük tekshürüshte atalmish “Shinjang siyasiti” ge a'it nuqtiliq ikki signalni bergenliki qeyt qilinmaqta. Xitaydiki “Sina xewerliri” ning körsitishiche, li chyang Uyghur diyarini xitayning “Dölet ichi we sirtigha échiwétish sewiyesini téximu yuqiri kötürüsh”, mezkur rayonda “Bayliq menbesige tayan'ghan alahidilik we ewzellikke ige igilik türlirini yétishtürüsh hem kéngeytish” ni otturigha qoyghan.

Xitay taratquliri li chyang Uyghur diyaridin ayrilghandin kéyinla uning rayonda tekshürüshte bolghanliqini andin xewer qilghan. Xitay taratqulirining néme üchün buni li chyang Uyghur diyaridin ayrilghandin kéyin xewer qilghanliqi namelum. Lékin li chyangning rayonda tekshürüshte bolushi, shi jinpingning bu yil 23-aprél küni béyjingda gherbni keng kölemde échish söhbet yighini chaqirip, bezi orunlashturushlarni élip bérishi, shundaqla amérika tashqi ishlar ministiri bilinkénning yéqinda xitayni “Uyghurlargha irqiy qirghinchiliq qilishni dawamlashturmaqta” dep eyiblishining arqisidinla élip bérilghan.

 “Sina xewerliri” ning bildürüshiche, li chyang Uyghur diyarida bolghan mezgilde, “Bash sékrétar shi jinpingning yéngi dewrdiki gherbni téximu keng échiwétishni algha sürüsh söhbet yighinida qilghan muhim sözining rohi we partiyening yéngi dewrdiki shinjangni idare qilish istratégiyesini téximu chongqur emeliyleshtürüp, bayliq menbesige tayan'ghan alahidilik we ewzellikke ige igilik türlirini yétishtürüsh hem kéngeytish؛ dölet ichi we sirtigha échiwétish salmiqini yuqiri kötürüsh kérek” dégen. Uning körsitishiche, Uyghur diyarining xelq'ara bilen bolghan “Soda, ma'arip, dawalash, medeniyet we sayahetchilik jehetlerdiki alaqisi kücheytilishi kérek” iken.

Xitay bash ministiri li chyangning xelq'arada xitayning Uyghur irqiy qirghinchiliqini jawabkarliqqa tartish, mejburiy emgekni cheklesh chuqanliri dawamlishiwatqan bir peytte, Uyghur diyarining ishlepchiqirish türlirini kéngeytish, sirtqa échiwétish salmiqini yuqiri kötürüshni otturigha qoyushi, diqqet qozghimaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.