Tutqunda turghan mongghul pa'aliyetchisi xada axiri öyige qaytti

Muxbirimiz méhriban
2014.12.09

“Döletni parchilashqa urunush” jinayiti bilen 1995-yili 15 yilliq qamaq jazasigha höküm qilin'ghan mongghul pa'aliyetchisi xada 2010-yili jaza mudditi tolghandin kéyinmu, ipadisi yaxshi emes dégen bahanide dawamliq qanunsiz tutup turulghan idi. Uning ayali shinna we oghli wéylenning uzun muddetlik erz qilishi, xelq'ara kishilik hoquq teshkilatlirining bésimi bilen, xada ependi dunya kishilik hoquq künidin bir kün ilgiri yeni 9-dékabir seyshenbe küni öyige qayturulup a'ilisidikiler bilen jem boldi.

9-Dékabir küni chüshte xada ependi qamaqtin qoyup bérilishi haman, erkin asiya radi'osining ziyaritini qobul qildi. Xada ependi sözide özining uzun yillardin kéyin yene a'ilisi bilen jem bolghanliqini, emma saqchilarning uninggha yenila qa'ide-tüzümlerni békitip bérip, uning erkinlikini chekleshke urunuwatqanliqini bildürdi. Xada ependi muxbirgha yene özining jaza mudditi tolghandin kéyinmu dawamliq qanunsiz tutqunda turghan 4 yil waqti üchün ichki mongghul da'iriliri üstidin qanun boyiche erz qilidighanliqini bildürdi.

Melum bolushiche, mongghul pa'aliyetchisi xada qamaqqa höküm qilin'ghan 15 yil we uningdin kéyin qanunsiz tutqunda turghan 4 yilliq türme hayatida bashtin-axiri öz iradiside ching turghan. Bu sewebtin saqchi da'iriliri teripidin köp qétim ten jazasigha we rohi jehettiki azaplashlargha uchrighan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.