Lobi shirketliri qara tizimlik tehditidin kéyin xitay bilen bolghan alaqisini üzüshke bashlidi

Washin'gtondin muxbirimiz uyghar teyyarlidi
2024.02.22

Yéqinda amérika dölet mejlisi xitay armiyesi bilen alaqisi bar dep qaralghan bir qisim shirketlerge xizmet qilghan amérika lobi shirketlirini “Qara tizimlik” ke élishni teklip qilghan idi.

Buningdin uzaq ötmey bu shirketler xitay xéridarliri bilen bolghan alaqisini üzüshni qarar qilghan. Melum bolushiche, bu lobi shirketliri xitay shirketliri üchün qilip kelgen lobichiliq pa'aliyetliri üchün ghayet zor sanda heq élip kelgen iken.

“Siyasiyon” (Politico) zhurnilining 2-ayning 21-künidiki maqalisige asaslan'ghanda, aldinqi hepte amérika dölet mejlisi bu heqtiki teklipni otturigha qoyghan. Shu qatarda washin'gton shehirining “K” kocha (K Street) sédiki eng dangliq lobi shirketliridin bolghan brownstéyn (Brownstein) shirkitige xitay armiyesi bilen chétishliq bolghan shirketlerge xizmet qilmasliqni uqturghan. Shuningdek bir qisim lobi shirketliri xitay xéridarliri bilen munasiwitini üzgenlikini bildürgen.

“Démokratiyeni qoghdash fondi jem'iyiti” ning yuqiri derijilik tetqiqatchisi krayg sin'gléton (Craig Singleton) xitaygha lobichiliq qilip kelgen bu shirketler heqqide mundaq dégen: “Lobiy shirketliri, bolupmu xitay herbiy qisimlirigha baghlinishliq shirketlerge lobiychiliq qilghan shirketlerge jeng élan qilish yeni qara tizimlikke élish her qandaq bir siyasiyon yaki hökümet emeldari üchün asanliqche jür'et qilidighan ish emes. Chünki bu shirketler siyaset belgilesh we meblegh toplashqa alahide tesir körsitidu.”

2023-Yili awghusttin bashlap xitay xésey guruhigha lobiyliq qilishni bashlighan akin gump stra'us (Gump Strauss Hauer & Feld) shirkiti xitay xéridarliri bilen bolghan munasiwitini üzgenliki heqqide bayanat élan qilghan. Bu shirket xésey guruhigha lobiychiliq qilish jeryanida 300 ming dollar lobichiliq heqqi alghanliqini doklat qilghan. Mushuninggha oxshash amérika teweside xitaygha lobiychiliq qilghan köpligen shirketler doklat élan qilghan we xitay bilen munasiwitini üzgen.

Mezkur xewerde déyilishiche, buningdin kéyin amérika dölet mejlisi ezaliri we xizmetchiler bilen bolghan söhbette lobi shirketlirini ochuq-ashkara bolushni, lobi shirketliridin xitay shirketlirige wekillik qilip qilmaydighanliqni ashkarilashni telep qilidiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.