Даңлиқ фотограф лү гуаң рәсмий қолға елинған

Мухбиримиз сада
2018-12-12
Share

Алдинқи айда үрүмчидики фотографлар йиғиниға қатнишиш үчүн уйғур дияриға барған даңлиқ хитай фотограф лү гуаң йәрлик сақчи даирилири тәрипидин рәсмий қолға елинған.

Фирансийә хәвәр агентлиқиниң 12-декабирдики хәвиридә ейтилишичә, мәзкур учурни лү гуаңниң ню-йорктики аяли шү шявли тивиттер арқилиқ тарқатқан болуп, қәшқәрдики сақчи даирилири йолдишиниң рәсмий тутулғанлиқини униңға билдүргән. Һалбуки, униң тутулушиға конкрет қандақ бир җинайәтниң сәвәб болғанлиқи тилға елинмиған.

Шү шявлиниң дейишичә, у һазирға қәдәр йолдишиниң қолға елинғанлиқиға даир сотниң яки башқа сақчи органлириниң уқтурушини тапшуруп алмиған. У мундақ дегән: "биз нөвәттә адвокатқа йолдишимниң делосини ишлигән хадим билән алақә қилишни һавалә қиливатимиз."

Хәвәрдә дейилишичә, лү гуаң ню-йоркта яшайдиған болуп, бурун бир нәччә қетим уйғур диярини саяһәтчи сүпитидә зиярәт қилған вә йәрлик фотографлар билән алақә қилған. У даңлиқ фотограф болуп, униң фото әсәрлири үч қетим дуняви мусабиқиләрдә биринчи дәриҗилик мукапатқа еришкән. У асаслиқи муһит вә иҗтимаий темилардики сүрәтләрни тартиш билән нам чиқарған икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт