Nobél tinchliq mukapat sahibi lyu shawboni qoyup bérish chaqiriqi kücheydi

Muxbirimiz méhriban
2017.06.27

Düshenbe küni 2010-yilliq nobél tinchliq mukapatigha érishken xitay türmisidiki siyasiy mehbus lyu shawboning jiger rakining axiri basquchida bolghini üchün, türme sirtida dawalinishigha yol qoyulghanliqi ashkarilan'ghandin kéyin, xelq'arada xitay hökümitidin lyu shawboni shertsiz qoyup bérish chaqiriqi kücheydi.

Gherb démokratik döletliridiki kishilik hoquq teshkilatliri, xitay démokratik teshkilatliri, pa'aliyetchiliri we amérika qatarliq dölet hökümetliri arqa-arqidin bayanat élan qilip, xitay hökümitini nobél tinchliq mukapat sahibi lyu shawboni shertsiz qoyup bérishke chaqiriq qildi. 27-Iyun küni xongkongdiki démokratik guruhlar xitayning xongkongdiki ish béjirish idarisi aldida namayish ötküzüp, xitay hökümitidin lyu shawbo we uning ayali lyu shagha erkinlik bérishni telep qildi.

Melum bolushiche, gérmaniyediki ilham toxtini qutquzush guruppisimu, 26-iyun küni mexsus bayanat élan qilip, xitay hökümitidin lyu shawbo we Uyghur ziyaliysi ilham toxtigha oxshash wijdan mehbuslirini shertsiz qoyup bérishni telep qilghan. 1989-Yildiki tyen'enmin oqughuchilar herikitining yétekchiliridin örkesh döletmu 27-iyun küni ijtima'iy alaqe torliridin féysbokta ochuq xet élan qilip, béyjing hökümitidin rak késilining axirqi basquchidiki lyu shawboni qoyup bérishni telep qildi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.