Ma shingruy xotende tekshürüshte bolghanda muqimliqning “Hemmidin üstün” turidighanliqini yene tekitligen

Xitayning Uyghur diyaridiki aliy rehbiri ma shingruy 30-mart küni xotende tekshürüshte bolghanda, muqimliqning Uyghur diyarida yenila “Hemmidin üstün turidighan amil” ikenlikini tekitligen.

Ma shingruy 2021-yili 12-ayda Uyghur aptonom rayonluq partkomning sékrétarliqigha yötkep kélin'gen béri, Uyghur diyarida aliy süpetlik ishlepchiqirishni aldinqi orun'gha qoyushni tekitlep kelgen bolsimu, lékin uning 30-mart küni xotende muqimliqning “Hemmidin üstün” ikenlikini qeyt qilishi diqqet qozghimaqta. Xitay taratqulirining ashkarlishiche, ma shingruy xotende tekshürüshte bolghanda, “Bash sékrétar shi jinpingning yolyoruqini her waqit este tutushni hemde ijtima'iy muqimliqni saqlashni her waqit aldinqi orun'gha qoyushta ching turush” ni telep qilghan. Xitay tartqulirining xewerliride, ma shingruyning xotende j x tarmaqlirini, karxanilarni, bolupmu kompartiyening yéza-kentlerdiki asas qatlam kontrolluq xizmitini tekshürgenliki qeyt qilinmaqta.

“Tengritagh tori” ning bildürüshiche, ma shingruy “Shinjangda asasi qatlam xizmitining intayin muhimliqi, bolupmu jenubiy shinjangda téximu muhim” ikenlikini éytqan. Halbuki, kishilik hoquq teshkilatliri we chet el tetqiqat orunlirining doklatlirida, xitayning 2017-yili bashlan'ghan chong tutqunida xoten xitayning eng qattiq basturushigha uchrapla qalmay, belki yene emgek küchlirini yötkesh we “Nopusni elalashturush” siyasitiningmu eng éghir ziyankeshlikige uchrighan wilayetlerning biri ikenliki qeyt qilinmaqta.

“Tengritagh tori” ning bildürüshiche, ma shingruy xoten j x tarmaqlirigha qilghan sözide xotendiki nahiye we yézilarning asasiy qatlam qanun ijra qilish küchlirini ünümlük kölemleshtürüp, ularning “Bir terep qilish” iqtidarini üzlüksiz östürüshni, yéza-kentlerning birinchi qol sékrétari we yéza-kentlerde turushluq xizmet etretlirining rolini téximu ünümlük jari qildurushni telep qilghan.

Ma shingruy yene shi jinpingning 2023-yili jenubiy afriqadin qaytish sepiride ürümchide toxtap, Uyghur aptonom rayoni we bingtüenning xizmet doklatini anglighanda, “Ijtima'iy muqimliqni saqlashni izchil birinchi orun'gha qoyush” ni telep qilghanliqini bildürgen. Melum bolushiche, ma shingruy ötken hepte ghuljada üch künlük tekshürüsh élip bérishning arqisidinla 30-mart xotende tekshürüshte bolghan.