Ма шиңруйниң байинғолин зияритидә “иқтисадни гүлләндүрүш” истратегийәсини тәкитлиди

Мухбиримиз әзиз
2022-01-06
Share

Уйғур аптоном районлуқ парткомниң секретари ма шиңруй 5-январ күни байинғолин областида хизмәт тәкшүрүшидә болғанда хитай һөкүмитиниң нөвәттики хизмәт истратегийәси һәққидә муһим йолйоруқларни бәргән.

Хитай һөкүмити башқурушидики “тәңритағ тори” ниң 5-январдики хәвиридә ейтилишичә, байинғолин областидики һәр дәриҗилик һөкүмәт әмәлдарлири билән болған сөһбәттә ма шиңруй “ши җинпиңниң шинҗаң хизмити һәққидики муһим йолйоруқлирини чоңқур изчиллаштуруш билән биргә асасий қатлам қурулушини күчәйтиш, йеңи типтики шәһәр-базарларни кеңәйтиш, әмгәк күчлирини ишқа орунлаштуруш, талант игилирини көпләп җәлп қилип күчлүк санаәт области қуруп чиқиш” ни тәләп қилған. Шуниң билән биргә бақмичилиқ, бағвәнчилик вә башқа игилик шәкиллири арқилиқ бай болушқа йүзлиниш һәққидә вәз ейтқан.

Зиярәт җәрянида ма шиңруй йәнә корла шәһиридики аһалиләр комитетини көздин кәчүрүп башқуруш вә контроллуқниң нөвәттики әһвалини сүрүштә қилған. Шуниңдәк рәқәмлик башқурушни күчәйтиш қатарлиқ бир қатар вәзипиләрни тәкитлигән. Шу қатарда тарим нефитликиниму көздин кәчүргән ма шиңруй бу орунлардики нефит вә тәбиий газ записини қезиш хизмитини күчәйтиш, шу арқилиқ күчлүк санаәт шәһири бәрпа қилип чиқиш һәққидә сөз қилған.

Хәвәрдә ейтилишичә, ма шиңруй бу қетимму “ши җинпиңниң шинҗаңни идарә қилиш истратегийәси”, “3-қетимлиқ шинҗаң хизмити йиғининиң роһини изчиллаштуруш”, “җуңхуа (хитай) кимлики чүшәнчисини чоңқурлаштуруш”, “милләтләр иттипақлиқи” дегәндәк кона сөзләрни тәкрарлиған болсиму “үч хил күчләргә қарши туруш”, “террорлуқ вә ашқунлуққа қарши күрәш қилиш” дегәндәк сабиқ секретар чен чүәнго әң көп тәкитләйдиған сөзләрни қилмиған. Әксичә байинғолин тәвәсидики охшимиған саһәниң иқтисадий сәвийәсини ашурушни алаһидә тәкитлигән.

Мәлум болушичә, нөвәттә уйғурларниң иқтисад саһәсидә көзгә көрүнгән вәкиллири бирдәк лагерларға қамиветилгән болуп, барлиқ игилик саһәси хитай көчмәнлириниң қолиға өтүп кәткәникән. Йәнә бир яқтин уйғур дияридики мәҗбурий әмгәк мәсилиси түпәйлидин хитай һөкүмитигә қаритилған бир қисим ембарго (җаза) тәдбирлири түпәйлидин уйғур дияридики һәрқайси саһәниң иқтисадий әһвалида рошән тәвриниш көрүнүватқанлиқи мәлум болғаниди. Ма шиңруйниң бу қетимқи зиярәттә иқтисадий темини муһим мәркәз қилиши бу саһәдики бәзи соалларға җаваб болуши мумкин, дәп қаралмақтикән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт