Ma shingruyning bayin'gholin ziyaritide “Iqtisadni güllendürüsh” istratégiyesini tekitlidi

Muxbirimiz eziz
2022-01-06
Share

Uyghur aptonom rayonluq partkomning sékrétari ma shingruy 5-yanwar küni bayin'gholin oblastida xizmet tekshürüshide bolghanda xitay hökümitining nöwettiki xizmet istratégiyesi heqqide muhim yolyoruqlarni bergen.

Xitay hökümiti bashqurushidiki “Tengritagh tori” ning 5-yanwardiki xewiride éytilishiche, bayin'gholin oblastidiki her derijilik hökümet emeldarliri bilen bolghan söhbette ma shingruy “Shi jinpingning shinjang xizmiti heqqidiki muhim yolyoruqlirini chongqur izchillashturush bilen birge asasiy qatlam qurulushini kücheytish, yéngi tiptiki sheher-bazarlarni kéngeytish, emgek küchlirini ishqa orunlashturush, talant igilirini köplep jelp qilip küchlük sana'et oblasti qurup chiqish” ni telep qilghan. Shuning bilen birge baqmichiliq, baghwenchilik we bashqa igilik shekilliri arqiliq bay bolushqa yüzlinish heqqide wez éytqan.

Ziyaret jeryanida ma shingruy yene korla shehiridiki ahaliler komitétini közdin kechürüp bashqurush we kontrolluqning nöwettiki ehwalini sürüshte qilghan. Shuningdek reqemlik bashqurushni kücheytish qatarliq bir qatar wezipilerni tekitligen. Shu qatarda tarim néfitlikinimu közdin kechürgen ma shingruy bu orunlardiki néfit we tebi'iy gaz zapisini qézish xizmitini kücheytish, shu arqiliq küchlük sana'et shehiri berpa qilip chiqish heqqide söz qilghan.

Xewerde éytilishiche, ma shingruy bu qétimmu “Shi jinpingning shinjangni idare qilish istratégiyesi”, “3-Qétimliq shinjang xizmiti yighinining rohini izchillashturush”, “Jungxu'a (xitay) kimliki chüshenchisini chongqurlashturush”, “Milletler ittipaqliqi” dégendek kona sözlerni tekrarlighan bolsimu “Üch xil küchlerge qarshi turush”, “Térrorluq we ashqunluqqa qarshi küresh qilish” dégendek sabiq sékrétar chén chüen'go eng köp tekitleydighan sözlerni qilmighan. Eksiche bayin'gholin tewesidiki oxshimighan sahening iqtisadiy sewiyesini ashurushni alahide tekitligen.

Melum bolushiche, nöwette Uyghurlarning iqtisad saheside közge körün'gen wekilliri birdek lagérlargha qamiwétilgen bolup, barliq igilik sahesi xitay köchmenlirining qoligha ötüp ketkeniken. Yene bir yaqtin Uyghur diyaridiki mejburiy emgek mesilisi tüpeylidin xitay hökümitige qaritilghan bir qisim émbargo (jaza) tedbirliri tüpeylidin Uyghur diyaridiki herqaysi sahening iqtisadiy ehwalida roshen tewrinish körünüwatqanliqi melum bolghanidi. Ma shingruyning bu qétimqi ziyarette iqtisadiy témini muhim merkez qilishi bu sahediki bezi so'allargha jawab bolushi mumkin, dep qaralmaqtiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet