Ма шиңруй уйғур районида хитайпәрәс адәмләрни бәрпа қилиш һәққидә йолйоруқ бәргән

Вашингтондин мухбиримиз уйғар тәйярлиди
2024.01.30

“хитай тор” ниң 2024-йили 1-айниң 24 күндики мәхсус хәвигә асасланғанда, ма шиңруй аптоном районлуқ сиясий кеңәшниң йиғинида мәдәнийәт-сәнәт, ахбарат-нәшрият саһәсиниң бирләшмә музакирисигә қатнашқан вә йиғинда сөз қилип, хитай җәмийитиниң асасий еңиға әмәл қилип, идийә вә мәдәнийәт асасини мустәһкәмләш керәкликини тәкитлигән.

Ма шиңруй мундақ дегән: “шинҗаңни мәдәнийәт билән озуқландуруш партийиниң йеңи дәврдики шинҗаңни башқуруш истратегийәсиниң муһим тәркибий қисми, у узун муддәтлик тинчлиқ вә муқимлиққа мунасивәтлик негизлик, асасий вә узун муддәтлик вәзипә. Кишиләрниң қәлбини хитай еңиға муҗәссәм қилиш, йеңи кишиләрни тәрбийәләш керәк” дегән.

Хитай һөкүмитиниң бу хилдики “шинҗаңни мәдәнийәт билән озуқландуруш” чүшәнчиси арқилиқ уйғурларни хитайлаштуруш вә еритип түгитиш урунуши уйғур елидә охшимиған шәкилләрдә қаттиқ қоллуқ билән иҗра қилинип кәлгәнлики мәлум.

Кишилик һоқуқни көзитиш тәшкилатиниң тәтқиқатчиси мая ваң “шинҗаңни мәдәнийәт арқилиқ озуқландуруш қурулуши” тоғрулуқ қилған сөзидә, “хитай һөкүмитиниң аталмиш ‛мәдәнийәт қурулуши‚ уйғурларни очуқтин очуқ хитайлаштуруш, бу әмәлийәттә инсанийәткә қарши җинайәт түсини алған” дегән.

Мутәхәссисләрниң билдүрүшичә, нөвәттә хитай һөкүмитиниң уйғур елиниң чәт районлардики йеза-қишлақлириғичә уйғурларни мәҗбурий ассимилятсийә қилиш, мәҗбурий хитайлаштуруш һәрикити техи уларниң күткинидәк нәтиҗә бәрмигән, шу вәҗидин хитай һөкүмити буниңдин кейин бу һәрикәтни техиму күчәйтиши еһтимали бар икән. “кишиләрниң қәлбини хитай еңиға муҗәссәм қилиш, йеңи кишиләрни тәрбийәләш” хитайниң бу сияситигә мисал болалайдикән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.